AUSTRIE. Un omaç al “Pari dai slovens de Carinzie”

Andrej Einspieler, insegnant, om politic, gjornalist e protagonist dal risvei nazionâl in Carinzie
Dusinte agns indaûr, ai 13 di Novembar dal 1813, al nassè Andrej Einspieler a Svecˇe (tod. Suetschach),  a dome un pâr di chilometris de frontiere slovene di vuê. Figure politiche di prin plan tal Votcent, al è calcolât ancje tant che “il pari dai slovens de Carinzie”. Ai 16 di Novembar al è stât un event memoratîf cuntune Sante Messe e la celebrazion te sale comunâl a Bistrica v Rožu (tod. Feistriz im Rosental), in presince dai rapresentants de minorance slovene.
***
Al à promovût la avualiance
Andrej Einspieler, predi, insegnant, om politic, gjornalist, al fo protagonist dal risvei nazionâl in Carinzie. Midiant di lui e, soredut, de sô ativitât di culture e di editorie, Clanfurt al devente – tai agns Cincuante dal secul XIX – il centri dal risvei nazionâl sloven. Tant che une des principâls figuris politichis, Einspieler al fo ancje membri dal consei provinciâl de Carinzie a Clanfurt. Einspieler al à lavorât dute la sô vite a pro de avualiance dal popul sloven e de lenghe in Carinzie, pe coesistence des dôs nazions, pal sufragji universâl e pe libertât politiche.
Tal an rivoluzionari 1848, al impastanà la associazion slovene “Slovensko društvo” che e à agjît pe creazion di un Stât nazionâl sloven dentri dal Imperi di Austrie. Dopo i studis di teologjie a Clanfurt, al lavorà dal 1852 tant che insegnant de lenghe slovene. In chel stes an, al impastanà a Clanfurt – adun cul vescul Anton Martin Slomšek e cun Anton Janežicˇ – la fradilance di Hermagor ”Društvo sv. Mohorjeva”, e al deventà il prin president. Par trê decenis, al è stât il plui grant combatint di cheste impuartante organizazion religjose e culturâl pai slovens de Carinzie.
Al à publicât diviers gjornâi: tra chei, Slovenec (il Sloven) e il setemanâl sloven Mir (La pâs), ma ancje altris in lenghe todescje come Stimmen aus Innerösterreich, la Draupost, Kärntner Blatt e Kärntner Volksstimme.
Intai gjornâi todescs, al à domandât plui voltis il dirit de minorance slovene di doprâ la lôr lenghe a scuele, tai uficis e tai tribunâi. Cun trê mandâts (1862-1863, 1871-1878 e 1880-1888), al lavorà come deputât parlamentâr a pro dai interès dai slovens in Carinzie.
Ispirât a lui, al è il premi Einspieler che al è assegnât ogni an dal 1988 di bande dal Consei dai slovens de Carinzie (NSKS) e de Associazion culturâl cristiane (KKS) a une personalitât che e ven des riis de maiorance de popolazion, ven a stâi un premi consegnât de minorance ae maiorance. Tal passât, tra i vincitôrs a son stâts ancje l’ex president Rudolf Kirchschläger, il storic Anton Pelinka, il vescul Egon Kapellari e il governadôr dal Sud Tirôl Luis Durnwalder. Durnwalder al à ricevût tal 2004 ancje l’ordin de libertât de Republiche di Slovenie “pal so lavôr a pro de minorance slovene”.
***
Handke al ricêf il premi Einspieler 2013
Al scritôr carinzian Peter Handke i è stât assegnât dal Consei dai slovens il premi Einspieler 2013. Intun comunicât stampe, a àn ringraziât Handke “pal so impegn pe leterature slovene in Carinzie”. Il sô lavôr al à fat cressi il lustri de leterature di minorance. Cun di plui, al ven ancje onorât il so impegn leterari pai dirits dal grup di minorance slovene.
Cul premi Einspieler si onore une personalitât publiche che e à mostrât la sô comprension e impegn pai problemis de minorance slovene. Par Handke – nassût dentri dal teritori di minorance e di mari slovene -, la Slovenie e i slovens a son stâts simpri un dai temis centrâi de sô opare leterarie. Te sô opare o cjatìn cuistions autobiografichis: il scritôr al cîr la sô proprie identitât tra chê de mari slovene e dal pari todesc, un soldât de Wehrmacht.  Salacor o vin chi un fenomen paralêl cu la cuistion de identitât furlane di Pasolini.
***
Handke te critiche
Dal 1996, Handke al ven criticât a cause de sô partesanarie acritiche pe Serbie te vuere dai Balcans dai agns ’90. Tal Març dal 2006, il scritôr al è stât provocatori, sostignint i nazionaliscj serps cu la sô presince dimostrative al funerâl di Slobodan Milosevicˇ. Peter Handke al à ancje domandât aes elezions presidenziâls in Serbie il sostegn pal candidât de estreme diestre Tomislav Nikolicˇ disint: “Se o ves citadinance serbe, o votarès par Nikolicˇ”.
Come persone al reste une vore dibatût, però cul premi Einspieler la minorance slovene e vûl ringraciâ il scritôr innomenât che, midiant di lui, la storie dai slovens in Carinzie e ven presentade a un grant public internazionâl. No son pôcs chei todescs o austriacs che a àn sintût pe prime volte de esistence de minorance slovene in Austrie leint une opare di Handke. ❚
✒ Janez Erat