Dilunc dut l’Istât, l’unic argoment di conversazion al jere il cjalt cence precedents: in Avost, pe prime volte, a son stâts misurâts plui di 40 grâts (par sei precîs, 40,5) a Bad Altenburg, in Basse Austrie.
Cumò, daspò che plui o mancul ducj a son tornâts des vacancis, la campagne eletorâl e jentre inte fase cjalde. Viodût che o vin un gnûf partît, il team dal miliardari Frank Stronach, ducj i partîts a scuegnin batisi ancjemò di plui dal solit. Però un grant grup in Austrie, vâl a dî chei che il passepuart austriac no lu àn, nol sarà in grât di metisi in zûc.
I esperts de democrazie e i migrants interessâts a domandin il dirit di vôt par ducj che a son a stâ e a lavorin in Austrie, fin a ducj chei che a scuegnin paiâ tassis. I ricercjadôrs sul teme de democrazie Rainer Bauböck e Gerd Valchars a àn presentât i risultâts di un studi european che al à analizât i diviers sistemis di elezion. Il risultât pe Austrie? Negatîf. Tal confront european la Austrie e je in ritart sedi in mert al dirit di vôt sedi te materie di acès ae citadinance (viôt ancje l’articul su chest teme tal numar passât), come che e à constatât la organizazion austriache SOS Mitmensch* intune conference stampe tal Avost di chest an. Daûr la lôr opinion, il stât presint al rapresente un ostacul tal procès de integrazion dai migrants. Il dirit di vôt al è un simbul impuartant dal jessi part di une comunitât democratiche.
SOS Mitmensch al à anunziât tant che segn di une democrazie che al cjape dentri pardabon ognidun – o, cun altris peraulis, une democrazie “inclusive” – di tignî a Viene ai 24 di Setembar une elezion nazionâl pai citadins cence passepuart austriac.
***
A son escludûts de partecipazion democratiche
“Il numar di residents forescj in Austrie al è di cirche un milion. Il 40% di lôr al è a stâ in Austrie za di plui di dîs agns, il 15% però nol è nassût in Austrie. Tra i paîs europeans, la Austrie e à lis plui altis cuotis di imigrâts te popolazion, ma e à ancje une des leçs plui restritivis in materie di acès ai dirits politics e di citadinance. Di chest al ven fûr che une gran part de societât, intant che e je subordenade aes leçs, e je escludude de partecipazion democratiche, come che al à criticât Bauböck dal Istitût Universitari European.
***
Studi: cemût che si vote in Europe
Secont une ricercje europeane che e met sot la lint ducj i sistemis di elezions, la Austrie si cjate dentri de minorance di dodis paîs europeans li che il dirit di vôt al è leât a strent ae citadinance.
Il dirit di vôt pai stranîrs al è te pe plui part dai membris de UE limitât aes elezions comunâls. Une espansion gjenerâl ae elezions regjonâls e je previodude in Danimarcje, Ream Unît, Svezie, Slovachie e Ongjarie. Come alternative al dirit di partecipazion democratiche dai imigrâts al reste dome di spietâ il timp necessari par otignî la citadinance – però ancje chi la Austrie si cjate intal grup dai paîs plui restritîfs in Europe adun cu la Danimarcje, i Stâts baltics, la Bulgarie e la Ongjarie -.
***
Ai 24 di Setembar la elezion parlamentâr dai “il to passepuart no mi impuarte!”
La organizazion SOS Mitmensch* e viôt te «esclusion di une part significative de popolazion residente ae partecipazion aes elezions une limitazion de democrazie». «La politiche austriache e rivuarde ducj chei che a àn sielzût la Austrie tant che il lôr centri di vite, indipendentementri dal lôr passepuart. Cussì, in maniere simboliche, o tignarìn elezions improntadis al ‘il to passepuart no mi impuarte’», al a dit Alexander Pollak, il puartevôs di SOS Mitmensch.
***
E i forescj, a cui daressino il lôr vôt?
Un sondaç atuâl di residents a Berlin e Stocarde al à mostrât che la metât dai migrants e volarès partecipâ ae politiche in Gjermanie, particolarmentri chei ben integrâts. Ancje cheste e je une testemoneance che la integrazion e la partecipazion ae politiche e ae vite sociâl a son une vore leadis une cun chê altre. I imigrâts che si sintin discriminâts – daûr chel sondaç – a varessin sielzût i partîts di çampe.
* SOS Mitmensch (= prossim, simil) http://www.sosmitmensch.at/ e je une organizazion pai dirits umans in Austrie. La associazion si considere un grup di pression (inglês: pressure group) che si bat pal rispiet dai dirits umans. L’obietîf al è il principi etic e politic che al declare che dutis lis personis a àn dirits e dovês compagns e chê stesse dignitât. La organizazion e je stade impastanade ai 10 dicembar dal 1992 tant che associazion. ❚
Janez Erat
