O vin sintût il dot. Massimo Lavarone, diretôr de tierce campagne di sgjâfs a Murùs in localitât Muris dal Prin ai 26 di Lui 2013 che nus à spiegât alc de storie dal insediament.
La SFA, midiant de sô sezion dal Friûl di Mieç e in colaborazion cu la Aministrazion comunâl di Murùs, in chescj ultins agns e à aprofondît lis ricercjis intune aree dulà che za intai agns ’80 a jerin vignûts fûr materiâi di ete romane (modons, monedis e une clâf), ancje se no si vevin mai cjatadis olmis di struturis. Dome midiant di une ricercje sientifiche, direzude dal dot. Maurizio Buora (diretôr sientific) e dal dot. Massimo Lavarone (archeolic coordenadôr), si à rivât a tirâ fûr i rescj di une grande proprietât fondiarie doprade in chê volte.
Cumò si è daûr a sgjavâ la part “rustiche” dal cjasâl (stalis e magazens) che, su la fonde dai reperts cjapâts sù (ceramichis, monedis, anforis), e je stade abitade tra il I secul p.d.C. e il III secul d.d.C.
Chest di Murùs al è il prin sgjâf sientific che al ven fat te aree culinâr e duncje al à une grande impuartance par dut il teritori.
La campagne di chest an in particolâr e je stade impuartantone par individuâ in linie di massime la estension des struturis murariis e par deliniâ miôr la lôr funzion: si trate di un grant curtîl sierât di mûrs; tor ator a son ambients funzionâi che a dan sul curtîl (forsit a jerin magazens) e cu la presince ancje di cualchi fogolâr. E je stade ancje individuade une struture interpretabile come un canâl di scolament pes aghis o lavuache.
La scuvierte plui impuartante però e je stade chê di une piçule plache di plomp dulà che e jere incidude une frase e un an (il 106 d.d.C.) che nus permet cussì di savê il periodi di cuant che e je stade doprade. Cun di plui a son stadis rilevadis ancje chestis dôs peraulis: “VITIS SENTINA”: chest element al fâs capî che si tratave duncje di une piçule targhe che e vignive metude suntun contignidôr di len che al veve dentri dai incalms di vît (o ben risits) par introdusi une vît (Setina) origjinarie de Italie centrâl.
Il sît di Muris al è duncje un sgjâf esemplâr par vie che al nas di une sinergjie tra l’ent public locâl e la Societât Furlane di Archeologjie (ent cualificât tal cjamp dal volontariât culturâl). Cun di plui al è daûr a fâ lûs su la vite dai prins colons romans tal teritori culinâr.
❚ Venusia Dominici e Giovanni Filippo Rosset
CJAMINANT TE STORIE. Lis ultimis dal sgjâf di Murùs
............