Pai 20 agns de Cjarte Europeane des lenghis regjonâls e minoritariis, Bruxelles i cride ae Italie

“Daspò vincj agns de adozion de Cjarte europeane des lenghis regjonâls o minoritariis la Italie no le à ancjemò ratificade. E je une situazion che il Guvier al à di risolvi in curt”.
La coincidence jenfri la cridade che e rive di Bruxelles, di bande dal vicepresident de ong di rapresentance des minorancis te UE, Davyth Hicks, in ocasion de cunvigne “Regional languages in the polices of the European union and its member States” tal Parlament european e lis celebrazions pal vincjesim de Cjarte europeane des lenghis minoritariis al è incindiôs.
Di fat, propit cuant che dapardut si inmanein manifestazions par celebrâ l’aveniment, in Europe si domandin cemût mai che in Italie nol sedi ancjemò ratificât il tratât internazionâl che al è bielzà jentrât in vigôr in 25 Stâts europeans. A ricuardâlu al è stât propit îr ancje il finlandês poliglot – dîs a son lis lenghis che al fevele – Johan Haggman, coordenadôr dal grup de Comission europeane che si ocupe di multilinguisim.
Haggman, che al à fevelât ae cunvigne inmaneade de Regjon polache de Pomeranie in colaborazion cu la Regjon Friûl Vignesie Julie par vie dal ufici di colegament di Bruxelles, al à confermât la grande atenzion pe situazion de lenghe furlane, che, al à garantît, “e ven tignude di voli in maniere costante dal Comissari european pal multilinguisim”.
In cont di chest, al è stât il diretôr de A.R.Le.F., William Cisilino, a spiegâ in maniere puntuâl il percors normatîf puartât insom de Regjon Friûl Vignesie Julie a pro de tutele dal furlan.
“La promozion des minorancis linguistichis – al à rilevât Cisilino – e deventarà simpri plui impuartante te suaze des politichis europeanis dal avignì, tant al è vêr che aromai lis lenghis minoritariis a puedin jentrâ, cu la stesse dignitât di chês altris in ducj i programs di finanziament de UE. Par cheste reson al è strategjic instaurâ rapuarts di colaborazion produtîfs cu lis organizazions che a son dongje des istituzions europeanis, tant che il European Language Equality Network (ELEN)”.
Propit il vicepresident di ELEN, Hicks, al à anunciât che la rêt e promovarà une domande par rivâ a vê liniis di finanziament di pueste cul fin di pandi l’ûs des lenghis minoritariis e regjonâls in Europe e al à ilustrât la propueste di istituzion di un Osservatori su lis politichis di tutele.
In particolâr, al è stât une vore interessant il confront jenfri la situazion de lenghe furlane cun chê casubiane presinte in Pomeranie. La analisi che e à metût a confront la situazion sociolinguistiche e à mostrât une vore di afinitâts.
La normative regjonâl di tutele fate buine dal Voivodât – che e à introdusût l’insegnament veicolâr a scuele – e à provocât un grant risultât di sensibilizazion publiche in pôc timp: dîs agns za fa i fevelants a jerin 50 mil, tal ultin censiment dal 2011 a son stâts 200 mil chei che a si son declarâts cun braure di lenghe casubiane. ❚
A.R.L.e.F.