PATRIE TECNOLOGJICHE. Salt, onest e blogarin: cemût che i furlans a scrivin i lôr diaris virtuâi su la Rêt

La ete dai blog, che plui di une volte e pareve finide scjafoiade par vie de incressite di Facebook, in Friûl e da fûr ancjemò cualchi butul. A son vivarosis soredut lis associazions e i comitâts: par viodi il sît di un di chescj, che dal 2006 no à mai molât l’imprest dal “diari online”, alore si pues pontâ il sgarfadôr (o browser, se o vês miôr) sul sît dal Comitât pe Autonomie e pal Rilanç dal Friûl (http://comitat-friul.blogspot.it). Cu la medie di un messaç ogni trê dîs (tal 2013), su chest sît si cjatin i comunicâts, lis gnovis e i intervents dai membri dal Comitât e no dome, che po dopo a son mandâts fûr soredut in maniere virâl a mieç di listis di distribuzion vie pueste eletroniche. La lenghe furlane e je doprade da râr.
Ancje il Comitât 482 al à un blog par furlan (http://com482.blogspot.it), che in bande dal lôr sît uficiâl al informe su lis condizions di aplicazion de legjislazions di tutele des comunitâts di lenghe minorizade dal Friûl.
Che e sedi pe difidence pai Social network come Facebook e Twitter, o par une sielte strategjiche di rivâ dome là che al covente, ancje la Union Scritôrs Furlans si ten strente il so blog, te direzion http://ladinsdalfriul.blogspot.it. Un volte par mês a vegnin publicâts un trop di articui che po dopo a vegnin fats zirâ ancje in forme eletroniche via e-mail te forme de riviste “LADINS dal FRIÛL” in formât PDF.
I furlans de diaspore di Turin che 10 agns indaûr si son dâts dongje te Associazion “Lidrîs e Butui”, a àn implantât un blog ae direzion http://lidrisebutui.wordpress.com, in funzion dal mês di Novembar.
Di là de presentazion de ativitâts de associazion, la pagjine e à inzornaments che no si fasin spietâ, puartant in Rêt la funzion di puint a dopli sens jenfri Piemont e Friûl che e je la mission di cheste clape. Come che si pues viodi sul sît, si tratin une vore di temis soredut culturâi: i dirits linguistics e la tutele, il cine, i media, la storie, i inovâi furlans impuartants. Par nô che o sin ancjemò a stâ te Patrie, nus puedin interessâ i inzornaments sore lis ativitâts des comunitâts di lenghe minorizade dal Piemont e de Val di Aoste: la francese, la francoprovençâl e la francese. Il pont di viste al è origjinâl, stant che a contâ i fats a son voi, orelis e lenghis di furlans: testemonis plui nestris par chel che al sucêt li che a vivin altris minorancis storichis. A son une vore i articui su gnovis publicazions e altris media, ma ancjemò plui vivis a son lis cronichis des partidis dal Udin, che no mancjin mai.
Si pues viodi cemût che i social network a sedin rivâts a supâ chei che a jerin i diaris personâi gjenerics des personis singulis, stant a vevin pocje atrative su la rêt. A ’nd è ancjemò blogs in vite, gnûfs e vecjos, jenfri chei che, invezit, a son leâts a un teme ben limitât.
Riflessions combativis e leadis ae croniche di cjase si cjatin tal diari di un autôr anonim: EuroFurlan. Ae direzion http://eurofurlan.wordpress.com di un pâr di mês al met in rêt pinsîrs leâts a lis cuistions identitaris furlanis.
Al è une vore simpatic il blog di Salvadeat (http://salvadeat.blogspot.it), un siôr che in tancj si inacuarzaran di cognossi par vê viodût i siei sprocs e rimis sui manifescj che al mostre cuant che al va a viodi lis partidis dal Udin.
Dal 2008 in ca, no à mai molât il blog “Scuele furlane”, leât a la istruzion dal e par furlan. La autore e je Lorele la Morete, mestre furlane in chel di Codroip. Lu cjatais culì: http://scuelefurlane.blogspot.it.
I intervents dal blog di Sandri Carrozzo, filolic e president de Cooperative di servizis informatics Serling, a àn fat une vore di scjas tai mês prin des elezions. I so diari al è culì: http://sandricarrozzo.blogspot.it.
Un altri diari che al à tratât di politiche ative tai ultins mês, dopo un lunc cidin, al è chel di Christian Romanini (http://christianromanini.blogspot.it).
Screâ un blog al è une vore facil e sore nuie, ma par tignîlu vîf e covente costance. La plui part dai utents si limite a doprâ la tastiere dome par fâ coments. O varessin gust di doprâ chest spazi par contâ di altris gnûfs diaris par furlan, magari propit chei dai nestris letôrs. ❚
Michele Calligaris