Resonament

O sbaliarai ma o ai la impression che Franco Marchetta, cul so articul Siums, cuant che il teatri nol dis nuie, su La Patrie di Avrîl al vedi chê di inviâ un dibatit. Di stiçâ i furlans a cjapâ posizion, a dî la lôr opinion intal mert des cuistions tiradis fûr.
Se la impression no je falade… ve ca cualchi domande che mi ven sù a mi (no rispuestis…chês no lis sai!)
Domande prime: par jessi modernis si aial par fuarce di fevelâ di robis di cumò?
Domande seconde: Par sedi modernis si aial par fuarce di sedi modernis?
Parcè varessie falît la Farie? Jo o ai viodude la rapresentazion di Siums ai 3 di Avrîl a Çarvignan. No sai se al vûl dî alc, ma la sale e jere plene…
Magari no i varà plasût a ducj, come che simpri al sucêt. A mi mi à plasût. O miôr: cierts tocs mi àn plasût une vore. Cuâi? Alore viodìn: il prin, chel cui atôrs fûr dal tendon, no mi à plasût, no ai capît gran. O soi tart di comprendoni, o sai, ma la comunicazion, ancje chê e passe pal mieç dal teatri, no varessie di vê come so finalitât chê di rivâ a ducj (o scuasi ducj)? Mi à plasût il secont toc, ancje pe bravure straordenarie di Elvio Scruzzi. Bielon il toc des trê feminis (e bravonis chês trê atoris) e biel ancje chel che al fevele dal ‘resurrequie’. Benut chel dal Benandant, plui scjars i ultins doi, massime l’ultin che (ma cjale!) al fevelave propi di robis di vuê.
Opinions, eh! Ognidun al pues vê lis sôs. E no pues nancje dineâ che il spirt critic al vegni indurmidît de sodisfazion di sintî il furlan fevelât intun teatri (robe che, fin a cualchi an indaûr, e jere un… sium!).
Dit dut chest: e je ancje vere che no si pues simpri contâ chê e simpri chê. I elements storics de nestre culture aromai ju cognossìn ducj. E al è di just fevelâ di alc di gnûf.
Par esempli: intal repertori de Associazion teatrâl furlane, no isal nuie di vonde valit di frontâ ancje un public dispatussât? Si capìs che al covente un brâf regjist e brâfs atôrs! A ‘nd isal? Ben, jo o pensi che la esperience dal Teatro incerto e sedi une ricjece no di pôc pal nestri teatri. A son stâts lôr trê che a àn savût interpretâ ben il rignuviment dal Friûl, inte sô struture sociologjiche, culturâl, antropologjiche e ancje linguistiche. E duncje il teatri furlan al è vivarôs, in graziis di lôr.
No mi somee une robe di pôc.
E salacor par culì al podarès passâ chel rignuviment che Marchetta, justementri, al domande.
✒ Laurin Zuan Nardin