SCLESIS-NEWS PAR CAPÎ CE CHE AL SUCÊT TRA I POPUI MINORIZÂTS ATOR PE EUROPE. Istruzion e lenghe tal Paîs Basc

Cuasi il 78% dai arlêfs futûrs dal Paîs Basc a varan l’Euskara tant che lenghe uniche di insegnament
I dâts preliminârs pandûts dal Ministeri de Istruzion Publiche basc a confermin che il 77,7% dai fruts che vuê a àn 2 agns a jentraran tal mont scolastic il prossim an daûr dal model D, che al previôt une istruzion dute par basc (Euskara in lenghe basche), cul castilian dome come materie obligatorie. Il 19,2% al sarà istruît daûr dal model B (sedi castilian sedi basc come materiis e lenghis di insegnament), e invezit dome il 3% al varà il castilian come lenghe principâl a scuele (model A).
I gjenitôrs a puedin sielzi un dai trê modei te fase di pre-iscrizion dai lôr fîs. Il model D al è la sielte plui popolâr za di une vore di agns. Chest al à contribuît a une incressite costante de cognossince dal basc tra i zovins bascs vie pai ultins agns.
Basc e castilian a son dal 1979 lis dôs lenghis uficiâls de regjon Euskadi (trê provincis ocidentâls dal Paîs Basc).