ATUALITÂT – SUNS: musiche in antologjie

La musiche furlane intai ultins agns e à vût un grant disvilup, cressint sedi in tiermins di cuantitât che di cualitât des produzions. Par ducj i passionâts de musiche in marilenghe, ma soredut par chei che no le cognossin ancjemò masse ben, e je stade pensade la Antologjie de gnove musiche furlane – Progjet Suns, presentade sabide ai 14 di Fevrâr aes sîs sot sere in Sale Ajace a Udin. Un progjet pardabon impuartant, sedi pe promozion de nestre lenghe e de nestre musiche, sedi parcè che al nas de colaborazion jenfri plui ents: la ARLeF, il Comun di Udin, e il CIRF de Universitât dal Friûl.
Come che al à spiegât Valte Colle, che zaromai di agns al coordene il Progjet Suns pal Comun di Udin, cheste publicazion e je dome la ultime tape di un percors tacât agns indaûr. La rêt Suns di fat e met dongje plui Ents e e je nassude propit cul obietîf di razionalizâ lis iniziativis in ambit musicâl sparniçadis sul teritori. La idee de Antologjie e je nassude propit come strument di cognossince: a son stâts sielts tescj di autôrs e gjenars musicâi difarents, indreçâts soredut viers un target plui zovin. In dut, dodis cjançons che a riassumin lis liniis vuide de musiche furlane fin al 1998, dodis artiscj impegnâts a leâ la lenghe furlane cun diviers gjenars musicâi, de tradizion ae sperimentazion daûr de inovazion de culture, dal costum, de editorie (no dome locâl) e dal marcjât (no dome discografic). Al è clâr che si à scugnût lassâ fûr une vore di tocs, ma al è ce che al sucêt par ogni racuelte, e i stes «protagoniscj» a ‘nt son cussients: il fin nol è chel di fâ la storie de musiche furlane, come che al dîs ancje Luigi Gregoris, curadôr de Antologjie pal CIRF.
Suns al è un biel prodot editoriâl, une vore curât ancje te part grafiche, robe che dispès, magari cussì no, no i stan masse daûr. Cui che al scolte il cd al cjate in zonte un librut cun fotos e informazions sui artiscj e sui discs di dulà che a son stâts gjavâts fûr i tocs. La ARLeF e à capît subit la impuartance di chest progjet, la sô versatilitât sul plan sedi de didatiche che de promozion, e di fat, lu à inserît tal so plan di politiche linguistiche. Une strade che e à dute la intenzion di continuâ a puartâ indevant, come che al à marcât il gnûf President, Lorenzo Zanon.
L’Assessôr ae Culture dal Comun di Udin Luigi Reitani daspò, al à rimarcât un aspiet une vore interessant, che magari i furlanofons masse dispès no notin: la sonoritât de lenghe furlane. Une lenghe ritmiche, musicâl, juste par fâ musiche e componi cjançons. Peraulis confermadis ancje di Glauco Venier, un dai musiciscj di chenti che cumò al à un grant sucès a nivel mondiâl: la incision pe ECM, la plui impuartante etichete di jazz, la nomination ai Grammy Awards dal cd Distances, doi premis internazionâi e concierts de Americhe ae Europe.
La serade si è sierade cuntun regâl une vore preziôs: un conciert al piano di Glauco Venier. Une ocasion uniche e pardabon emozionante, pecjât che in sale no fos plui int: alc te promozion dal event nol à funzionât masse ben, e i furlans a àn pierdût une biele serade di musiche e di culture.
FEDERICA ANGELI