AI 32 DI MAI. Cuant che a dividi e je la coriere

Cemût che al cambie il mût di viodi une robe: cuant che internet al à scomençât a slargjâsi, ducj a disevin che al varès metût adun il mont, e cumò, invezit, cu la storie dal «digital divide», al samee che plui che meti adun al vedi dividût cui che al à di cui che invezit nol à. Par digital divide (divari digjitâl, dispès scurtât in DD) si intint il divari che al è tra cui che al pues acedi aes gnovis tecnologjiis (internet, computer) e cui no.
Par me, internet al è come la coriere par lâ a scuele. Ancje chê al principi al someave che e metès adun e invezit dopo un pôc e à scomençât a fâ dut il contrari.
Di fat, cuant che o lavi aes superiôrs, internet no lu veve ancjemò nissun, ma chei che a vignivin dai paisuts a jerin separâts distès di chei di Udin dal «coriere divide».
Il fenomen dal «coriere divide» al romp la continuitât temporâl: i udinês a vivin il timp come une secuence di seconts, di minûts e di oris, par chei dai paisuts, invezit, il timp al è chê distance che passe di une coriere a chê altre. Par me, al lave des siet di matine aes siet e un cuart di sere, cuntune buse  temporâl de une e mieze aes cinc. I fantats colpîts dal «coriere divide» no podevin decidi di stâ a gustâ a Udin e tornâ a cjase subit dopo, parcè che «subit dopo» al voleve dî cuatri oris. Cussì, i udinês a fasevin un grum di sports e di ativitâts extra scolastichis e invezit la nestre ativitât plui comune e jere chê di spietâ che e passàs la coriere. Par fuarce: se e jere une lezion o un alenament aes cuatri, l’udinês al tornave a cjase a mangjâ, al scomençave a studiâ alc, al lave al apontament e subit dopo al tornave a cjase. Noaltris o vevin di restâ a mangjâ un panin tal bar, spietant lis cuatri, e dopo de lezion spietâ ancjemò, fin che no rivave la prime coriere.
Ma il sfasament temporâl no si fermave ae organizazion de zornade: il «coriere divide» si slargjave ancje a altris robis, come la mode. I jeans colôr di ros, par dînt une, che a Udin a jerin disparîts di almancul doi agns, si slargjavin ancjemò une vore ben tes zonis cjapadis dal «coriere divide», e cuant che i nestris amîs citadins a scoltavin l’ultin cd di un grup punk rock, noaltris o platavin la cassete dal «Zecchino d’Oro» e – za che o jerin – ancje il «Corriere dei Piccoli».
Ma cumò al è cambiât dut, e internet al è mancul seletîf de coriere. Un grum di paisans che a patissin ancjemò il «coriere divide» a puedin organizâsi un viaç, fâ shopping e tantis altris robis ancje cence lâ a Udin.
Tal gno paîs, però, internet a bande largje nol è rivât. Fortune che cumò o vîf in citât, alore, cussì o pues lâ subit su internet a comprâmi chel pâr di jeans ros che o ai viodût su «Topolino».
BETE DI SPERE