SPECIÂL – I furlans lu clamin «Muselibri»

Facebook al è il mût plui costrutîf par pierdi timp. Facebook al è il mût plui facil par cjatâ (e par çatâ cun) i vecjos compagns di scuele o i cusins che a vivin a Sidney o a Toronto. Facebook al è in plen boom, e al pues deventâ ancje un lûc di lavôr. Facebook al robe la tô privacy, fasint viodi lis tôs  robis a ducj. Chest al è il plui innomenât dai social networks (vâl a dî des rêts sociâls in internet) dal mont: Facebook al cjape il so non dal anuari che, tes scuelis americanis, si stampe ogni an cu lis musis di ducj i students. Un lûc, no plui tant virtuâl, dulà cjatâsi par discuti, divertîsi, scambiâsi informazions, ma che al à ancje atirât un grum di critichis pe sô gjestion des informazions personâls dai utents.
A NO SI PAIE NUIE_ Cheste realtât, che par furlan e je clamade «Libri des Musis» o ancje – in mût scherçôs – Muselibri, e je nassude tal 2004 in gracie dal zovin Mark Zuckerberg, student inte universitât americane di Harvard. Partint dal mont universitari dai Stâts Unîts, Facebook al è lât a concuistâ il mont. Par iscrivisi no si paie nuie, stant che il sît si sosten cu la publicitât, che e ven mostrade tai banners. A vuê, il sît al conte 160 milions di iscrits tal mont.
PARCÈ DOPRÂLU_ Prin di dut par divertîsi. Al baste iscrivisi e, partint dai dâts personâi, Muselibri al consee personis che o podaressin cognossi (ex compagns di scuele, int dal gno paîs e vie indenant). Par interagjî cuntune persone si à di jessi «amîs»: si invie une domande di amicizie ae persone in cuistion e se cheste e dîs di sì, si pues scomençâ a scrivisi e viodi lis «bachechis» un di chel altri, vâl a dî la pagjine personâl di ogni utent. In pôc timp, si pues cognossi tante int, e fâ cressi la rêt di contats. Insieme a celulârs e sms, Facebook al è daûr a deventâ il medium plui doprât par comunicâ in maniere istantanie tal mont.
PARCÈ NO DOPRÂLU_ Si dîs che, jentrant su Facebook, no si pues plui vignînt fûr. Dut ce che si publiche al devente proprietât de societât americane che e gjestìs il sît, e in câs di identitâts clonadis (vâl a dî personis che si fasin crodi altris) no si pues fâ nuie. La veretât, tra dutis chestis «leiendis metropolitanis», e sta tal mieç: e je vere che i nestris amîs a puedin viodi dut ce che o fasìn su Facebook, ma se no volìn fâ savê une robe, al baste no fâle doprant il social network. Par esempli: se o ai di fevelâ di robis di lavôr cuntune persone, i mandarai une e-mail e no scrivarai te sô bacheche, dulà che ducj a podaressin lei ce che o ai scrit.
IN ITALIE_ Il nestri Paîs al à discuviert Muselibri di pôc. A Zenâr dal 2008 a jerin dome centmil i utents talians. Po, di Avost indenant, il boom: vuê a son plui di cuatri milions, e a cressin ogni dì. L’Eurispes, tal so Rapporto Italia 2009, al à dit che il Nordest al è une des zonis cun mancul utents.
IN FRIÛL_ Ma, curiosant tra lis pagjinis di Muselibri, si discuvierç un mont in marilenghe creatîf e une vore vîf (ahi, ahi Eurispes…). Cheste e je la muse biele di Facebook, un medium che al permet a piçulis realtâts tant che chê furlane di vê un respîr mondiâl, e di fâ cognossi lis lôr ideis a ducj (al baste lei l’articul culì in bande di Valentina Pagani). Parcè che, di là dal cjatâ amîs, Facebook al permet di riunîsi in grups di vore su determinâts argoments, di sostignî causis, e di fâ sintî al mont la proprie vôs.
NO DOME MUSELIBRI_ Si sa, noaltris furlans o vin i pîts ben plantâts par tiere. Cussì, in plui di Muselibri o vin colonizât ancje rêts sociâls plui orientadis su tematichis leadis al lavôr. Par esempli LinkedIn, il business network internazionâl che dal 2008 al pues contâ ancje su FriulIn, il club dut par professioniscj furlans o che a lavorin in Friûl. Al funzione come Facebook, ma l’obietîf finâl al è chel di creâ lavôr e contats tra lavoradôrs. Par ducj chei che ancjemò a disin: ah, no sta pierdi timp denant dal ordenadôr, va là a lavorâ!
Davide Francescutti