Paîs Basc: passe cent mil personis pai presonîrs politics

Sabide ai 12 di Zenâr passe cent mil personis, almancul 115 mil daûr di diviersis stimis, a àn colassât il centri di Bilbo / Bilbao par chê che e ven calcolade la plui grande manifestazion popolâr inte storie resinte dal Paîs Basc. La iniziative e jere stade clamade dongje de organizazion Herrira par domandâ il rispiet dai dirits dai presonîrs politics bascs e par sburtâ lis autoritâts spagnolis e francesis a impegnâsi intune soluzion pacifiche par risolvi il conflit basc. Plui intal specific si domandave la fin de politiche penitenziarie di ecezion cumò in vore cuintri dai presonîrs bascs che e previôt la dispersion e il slontanament dai presonîrs dai lûcs di divignince, che no ur da dirit ai sconts di pene che la leç e previodarès par cui che al è in preson, e che e pidimente la liberazion di chei presonîrs che a patissin di malatiis terminâls.
La iniziative e à cjatât la poie di cetancj sogjets, dentri e fûr dal Paîs Basc, ma tra i partîts dal panorame basc l’unic a dâ la sô adesion uficiâl al è stât EH Bildu, coalizion de çampe indipendentiste basche. Chel istès e cundut de ploie, la partecipazion ae manifestazion e je stade cussì massive che a son saltâts ducj i oraris previodûts pe sô partence e pe sô conclusion e che, in plui di chês decidudis pal percors, dutis lis stradis dulintor a son stadis subissadis di int. Une vore significative ancje la delegazion rivade dai Paîs Catalans cun rapresentants di ERC e de CUP in prime linie. Pai rapresentants dal partît socialist e di chel popolâr, la soluzion al teme dai presonîrs no passe pes manifestazions. In place però a jerin ancje elets socialiscj e dal PNV, cundut de no adesion dai lôr partîts ae iniziative. La manifestazion che, ancjemò une volte, e à mostrât trop che intal Paîs Basc il probleme dai presonîrs politics al sedi sintût une vore e in maniere trasversâl.
***
Paîs Catalans: prin acuardi su la declarazion di sovranitât
Daûr di ce che a vevin concuardât intes setemanis stadis, CiU e ERC a àn metût jù il stampon de Declarazion di sovranitât dal popul catalan, prin pas intal procès par rivâ ae indipendence de Catalogne. Lis dôs fuarcis politichis plui votadis intes ultimis elezions catalanis a àn presentât il test ai 10 di Zenâr e, te stesse zornade, lu àn zirât ai rapresentants di chei partîts, tant che ICV-EUiA, CUP e PSC, che a podaressin sotscrivilu ancje se cun cualchi modifiche. Il document al è svilupât su sîs ponts: il prin al dîs che la sovranitât i spiete al popul catalan; il secont al fevele dal dirit ae autodeterminazion tant che di at di legjitimitât democratiche; il tierç al bat sul principi de trasparence e sul dirit dai citadins a vê plene informazion sul procès di autodeterminazion; il cuart al impegne a inviâ, intant dal procès, un dialic cul stât spagnûl, cu lis istituzions europeanis e cun chês internazionâls; il cuint al mostre la volontât di restâ inte suaze de Union Europeane; e l’ultin al previôt di bati ducj i percors democratics par rivâ a esercitâ il dirit ae autodeterminazion.
***
Bretagne: petizion par une tv publiche bretone e bilengâl
Ai 14 di Dicembar il Consei regjonâl de Bretagne al veve fate buine cuasi ae unanimitât une mozion là che si sburtave la creazion di une television publiche che e rivàs a dute la Bretagne, duncje ancje ae Loire Atlantiche che dal pont di viste aministratîf e fâs part di une altre regjon, e che si indreçàs a ducj i bretons, ven a dî che in plui dal francês e dopràs ancje la lenghe proprie de Bretagne. Un tant al rive intun moment là che il guvier di Parîs e la direzion de television publiche francese si mostrin disponibii a riviodi l’implant dal canâl France 3 intun sens plui regjonalist. Cumò, a front di cheste situazion, e je stade inviade ancje une petizion in rêt indreçade massime ai citadins de Loire Atlantiche par domandâur che a sburtin ancje lôr par une television publiche bretone e bilengâl.
✒ www.internazionalitari.blogspot.com