Don Chissot in Friûl

“(…) cuant ch’a si è cjapâts da la passion e il cour ti fâs sintî il so pês nol è nuie ce fâ, sior Chisot, nuie ce fâ: tocje scombati cuntre li palis dai mulins.”
Il Teatro Incerto al à publicât intun librut de cjase editore Kappa Vu, il test dal so fortunât spetacul teatrâl Don Chissot.
La storie e je chê di trê scancarâts atôrs che, vint cjapât un contribût par fâ une rapresentazion teatrâl par furlan, a metin in sene la grande opare di Cervantes ambientantle in Friûl. E tache cussì une trame che e messede la comicitât de comedie cun moments di riflession plui profonts cul stîl carateristic dal Teatro Incerto.
Su la riessude rapresentazion teatrâl si rimande a lis bielis peraulis scritis di Ilarie Colùs tal numar di Avrîl dal 2011 di cheste riviste.
Se di une bande la version su cjarte no pues mantignî la vitalitât dal palc e lis capacitâts istrionichis dai atôrs, (ancje se lis sugjestivis fotos di sene di Luca d’Agostino, che a compagnin il test, a rivin a rindi la atmosfere dal spetacul), si à di marcâ che la opare su libri e jê dut câs meritevule, e par plui di une motivazion.
Intant e je di sigûr biele e divertente di lei, che nol vuaste! E manten di fat dute la ironie e la lizerece tipiche dal trop di atôrs/autôrs e anzit la lôr mancjance seniche e sonore e fâs risaltâ di plui la bravure autorâl cun batudis fulminantis e tocs profonts semenâts ca e là.
“ – Ma ce râsse di eroe êse un ch’a li’ cjape simpri? –
– L’eroe al è chel ch’a no si lâsse mai pleâ, al è l’invincibil ch’al torne a jevâ su pront a frontâ la prossime sconfitte. -“
Une peraule e merete ancje la lenghe doprade, che par altri e je une des carateristichis dal Incerto, che al cîr un lengaç vîf e duncje che al sedi dongje a la lenghe fevelade.
I dialics a son inte variante di Grediscje di Sedean e no mancjin, anzit a son cirûts, i talianisims tipics de lenghe vive. Dut câs si à une elegance e une frescjece, ven di dî une bielece, che a voltis e mancje in oparis in teorie plui rigorosis.
Ae fin si finìs ducj cul vignî rapîts des aventuris di farse dai nestris erois fin al gjeniâl colp di sene finâl che al fâs sì che cheste reinterpretazion de opere mestre di Cervantes e deventedi une piçule perle.
✒ Maurizio Biasizzo