FRIÛL EUROPE. Lenghis minoritariis, la Cjarte europeane e finìs vincj agns

La Cjarte europeane des lenghis regjonâls o minoritariis e à finût vincj agns. Chê convenzion dal Consei de Europe (CdE) dedicade ae garanzie dal pluralisim culturâl e dai dirits linguistics e vignive vierte ae firme dai Stâts ai 5 di Novembar dal 1992. Di in chê volte le àn sotscrivude 33 Guviers europeans e di chei in 25 le àn ancje ratificade. La Cjarte, compagn che la Convenzion di suaze pe protezion des minorancis nazionâls, che e je chel altri tratât european a pro des minorancis e de lôr tutele, e proferìs principis di fonde che a valin par dutis lis lenghis e par ducj i Stâts che le ratifichin e une schirie di disposizions che a puedin mudâ daûr dal Stât e daûr de lenghe. La metude in vore dai siei contignûts de bande dai Stâts e ven monitorade di un Comitât di pueste, che al prepare relazions tecnichis che a deventin la base pes risoluzions specifichis fatis buinis dal Consei dai Ministris dal CdE.
La Cjarte, che e je jentrade in vore tal 1998, dopo dal completament de ratifiche de bande dai prins cinc Stâts, e je stade sin dal principi un pont di riferiment sei pes rivendicazions des minorancis che pe normative statâl e regjonâl. Al è esemplâr il câs de Leç regjonâl 15 dal 1996, il prin vêr proviodiment organic di promozion de lenghe furlane, che e à cjapât sù diviers indreçaments di chê convenzion. Al è fintremai sucedût che chê che si pues clamâle une sô prime version, fate buine dal Consei regjonâl ancjemò tal mês di Setembar dal 1995, e vignìs fermade dal Guvier par vie che la Regjon e declarave la sô adesion a di un tratât internazionâl che in chê volte il Stât talian nol veve nancje firmât.
Cun di fat la firme taliane e je rivade dome ai 27 di Jugn dal 2000. Propit in chestis setemanis un stampon di leç di ratifiche de Cjarte al è in Parlament. E varès di jessi une biele gnove ma nol è cussì, stant che impen di svicinâ la Italie ae Europe al interprete a talian vie la convenzion di Strasburc e al sbasse il nivel de tutele des minorancis, in particolâr chê di furlans e sarts. In Sardegne, parlamentârs e Regjon a àn tacât a fâsi sintî cun Rome. In Friûl, almancul par cumò, nissun moviment. ■
MARCO STOLFO