TV FRIÛL E CJANÇONS. Spietant il 2013

Se i Maya a àn sbaliât (e sperìn di si), al sta par rivâ il 2013, e come ogni an al rive compagnât di une trasmission televisive plene di bai e di fiestis, e plene di ospits che une volte a jerin famôs e cumò no ju vûl plui nissun.
Pai furlans che no si ricognossin in chestis trasmissions, ancje la television furlane e trasmet il so veion, in direte di Place Libertât, cun Florean e Venturin vistûts in smoking.
I ospits? Ducj todescs, di chei che a vegnin di Istât a Lignan. Si sa che par rispietâ la tradizion al covente alc che al puarti bêçs, e par chê finalitât, i todescs a funzionin sigûr miôr di un plat di lints.
Spietant la miezegnot, si cjalaran dutis lis imagjins plui impuartantis dal 2012: i goi dal Udin e i goi cjapâts de Triestine.
Cuant che e rive dongje la ore, si scomence cu la musiche. Nuie trenuts: par balâ i ospits a fasin il “tratôr”, cjantant “Meu amigo Meni” (dome doi minûts, che no pâr bon fâ masse fieste in timps di recession).
Dopo dal cont par ledrôs – che al scomence di cinc par no pierdi masse timp in cjacaris – si distrope une butilie di Tocai (ae fieste de tv furlane no son invidâts ongjarês che a puedin contestâ il non), e bon 2013 a ducj!
Presentadôrs e ospits si bussin ducj par fâsi i auguris. Sot dal visc? No, sot di une vît, che sigûr e puarte miôr.
E dopo? Ancjemò bai e musiche? Nancje par insium: la sagre e finìs li. Par saludâ il gnûf an, i presentadôrs furlans a finissin di balâ e a scomencin a purcitâ. Cussì si mangje alc di bon, si fâs alc di util e soredut si lavore. No si sa mai: se par câs al à reson chel proverbi che al dîs che ce che si fâs il prin dal an si fâs dut l’an, miôr no riscjâ di stâ dut il 2013 cence fâ nuie! ■
BETE DI SPERE