MUSICHE. Cjantautôrs che a cirin “l’acuilon”

Emilio Nardini, Pier Paolo Pasolini fint a Ermes di Colorêt. La grande poesie furlane si incuintre cu la musiche e indaûr.  Ma no dome. Si studiin ancje Fabrizio De Andrè e Claudio Lolli, par fâ doi esemplis, intal laboratori di scriture creative di cjançons organizât de associazion culturâl Bottega Errante e Radio Onde Furlane. Mestris di ecezion, il cjantautôr di Sudri Lino Straulino e il poete Maurizio Mattiuzza. Insiemit i doi a àn realizât l’album Tiere nere (Nota, 2001), Blu (Nota, 2003) e il toc Highway, ma ancje cumò a son che a lavorin a gnûf tocs par un disc che, nus disin, al vignarâ fûr il prossin an. Cun lôr ancje un ospit speciâl, Renzo Stefanutti. Scomençât ai 16 di Otubar, il workshop intai misteris de cjançon al larà indenant fint ai 4 di Dicembar e si sierarà cuntune pontade live di Onde Furlane indulà che o podarìn scoltâ lis creazions dai partecipants.
Cemût che e nas une cjançon; e po struture, misuris, strofis, ritornel. Il refrain e il bridge. E lis grandis scuelis europeanis.
«O sin daûr a viodi un bon interès dai corsists», nus conte Mattiuzza, «curiôs che al sedi soredut pe parte testuâl dal procès de nassite di un toc. Ancje par chei che a àn confidence cuntun strument musicâl, la part plui misteriose a son lis peraulis, plui che la melodie». I partecipants a cheste “buteghe” artistiche a son une desine di personis dai 17 agns ai 50 e plui, metât oms e metât feminis, che a provin a fâ musiche par talian e par furlan.
– E ce diference ise tra lis dôs lenghis?
«Al è come studiâ dôs materiis diviersis. Al è come par un marangon lavorâ doi lens: cu lis dôs si puedin fâ robis maraveosis, ma cun naturis dal dut difarentis», al dîs il poete furlan, «par me e par Lino il furlan al è une lenghe cuntune musicalitât straordenarie, cuntune vore di peraulis e cuntun significât emotîf impuartant».
Un cjapitul dal cors al sarà dut su la cjançon popolâr, e sul grant patrimoni di vilotis e baladis tradizionâls cheo vin a disposizion.
– Ma sino duncje ducj potenziai cjantautôrs?
«Podìn jessi ducj potenziâi bogns scoltadôrs», nus rispuint Maurizio Mattiuzza, «de scolte si pues daspò fâ rivâ la juste ispirazion. Si puedin imparâ lis tecnichis plui buinis par tirâ fûr cun plui agjilitât ce che o vin drenti e fâlu svolâ adalt. Ma l’acuilon un al à za di vêlu dentri di se». www.ondefurlane.eu – www.bottegaerrante.it ■
Natascia Gargano