VIERTIDURE. La comission pe riforme

Ai 6 di Novembar e je proviodude la peraule de Cort Costituzionâl in merit al ricors che la Regjon e à presentât par difindi lis sôs competencis statutariis in merit al ordenament dai ents locâi a front des disposizions di Rome che a àn proviodût di aplicâ ancje in Regjon la riforme des Provinciis (a restaressin Udin e Triest). Se la Cort e darà reson al Friûl Vignesie Julie, come che al podarès stâi, e sarà compit de Regjon proviodi a une riforme istituzionâl. Par chest, vie pal Istât e je stade metude sù in Consei regjonâl une comission speciâl che a sintût la vôs di 56 rapresentants dal teritori: fuarcis economichis, istituzionâli e ancje dai mieçs di informazion, cul intindiment di rivâ ae sentade dal Consei regjonâl dal prin di otubar cuntune propueste.
La strade però par rivâ a une leç di riforme e je ancjemò lungje e sore il dut no si è cjatât ancjemò un troi precîs e tant mancul unitari. Tant che, biel che si fasevin lis audizions, il partît dal Idv al à presentade une sô propueste di riforme. Il Pd al à fate une sô relazion e i stes membris de comission speciâl a son stâts dividûts su cemût presentâsi al apontament dal Consei: se cuntune propueste organiche o si ben cuntun struc resonât des 56 posizions scoltadis tes audizions. Jenfri chestis, al à dit il president de comission, il conseîr regjonâl Antonio Pedicini (Pdl), «cualchidun al à difindût ce che al esist cumò, ma la plui part e à domandât di lâ oltri la ripartizion aministrative atuâl». La preocupazion principâl, al à zontât Pedicini, e je che di «vê une organizazion plui eficient, lizere, che e sepi rispuindi benon a lis esigjencis di impresis e citadins. Cence trascurâ il fat che no pues jessi pierdude la rapresentance identitarie che a àn i teritoris provinciâi».
In dì di vuê, in sumis, il glimuç al è ancjemò ingherdeât, tant che il stes Pedicini al à vût mût di dî: «O vin di fâ une propueste di fonde che no scjassi i ecuilibris, ma che e oblei a pensâ e si presenti tant che un riferiment par che te prossime legjislature (te Vierte dal 2013 si vote pe elezion dal gnûf Consei regjonâl) cualsisei che al vinci al puedi continuâ il troi». ■
Antonella Lanfrit