Sabide ai 19 di Avost, di Grau e je partide une letare: destinatari il President de Regjon Renzo Tondo, mitent Marco De Agostini, segretari politic dal Moviment Friûl. Le publichìn par che ancje i nestris letôrs a podedin leile
Preseât Sâr Renzo Tondo
President de Zonte Regjonâl
dal Friûl-Vignesie Julie
Preseât President,
considerade la sô insensibilitât politiche e culturâl che ducj a san viers la lenghe dal popul furlan, che e je chê che nus à ben dimostrade la politiche linguistiche davuelte de Sô Zonte di cinc agns a cheste bande, o stimìn dut câs di dovê di fâi presint, in cualitât di custodis de memorie e de ereditât politiche dal partît storic dal autonomisim furlan, che al sarès compit So di sburtâ la Zonte Regjonâl a deliberâ un ricors imediât e formâl ae Cort Costituzionâl pe incostituzionalitât palese dal gnûf paragraf su la spending review che al discrimine e al fâs violazion dai dirits de minorance linguistiche furlane e di altris minorancis de Republiche. O stimìn ancje che chê discriminazion stesse, che si met dongje ai risultâts de politiche linguistiche de Sô Zonte, e vedi efiets distrutîfs su la possibilitât di mantignî la autonomie speciâl de Regjon, che e cjape dentri la nazionalitât furlane, se no si le contraste te maniere plui decise, cul denunziâ la sô nature, contrarie ae normative internazionâl e di specifiche atuazion dal art. 3 dal Statût Speciâl.
Di cuant che il Moviment Friûl al à decidude tal 1992 la sospension de sô ativitât politiche direte, in tes istituzions, te sperance che altris sogjets a fossin intenzionâts e bogns di percori miôr e in forme plui fative lis direzions dal program autonomist storic, o vin podût assisti a un declin inesorabil e progressîf de capacitât di autonomie di cheste Regjon, no dome e no tant pes incursions politichis e istituzionâls dal Stât centrâl, ma plui che altri pe disposizion mai superade de classe politiche furlane a dâur seont daûr dai rituâi di un plui che secolâr servilisim. Chei sogjets no esistevin tal 1992 e no esistin cumò, ancje se si son clamâts autonomiscj e cualchidun al continue a pretindi di clamâsi cussì.
Se tal 1996 e je stade votade dal Consei la leç 15 par inviâ une politiche linguistiche de lenghe furlane in cheste Regjon daspò decenis di ritarts e di omissions, pensade e scrite te sôs liniis fondamentâls dîs agns prin dentri dal Mf, chest al è sucedût, si lu viôt ben cumò, parcè che il mont politic regjonâl di chei agns al veve cjapade pôre dal sucès eletorâl de Lega Nord tal stes moment che al veve pensât, valutant mâl in part, che il messaç storic dal Moviment Friûl si fos trasferît alì. I agns des dôs ultimis legjislaturis a àn viodude la riduzion progressive dal impegn de regjon viers la lenghe furlane, il disvuedament progressîf de leç di tutele e de capacitât dai orghins regjonâi di politiche linguistiche, il sviament dai fonts necessaris pe tutele viers altris direzions une vore discutibilis. Cumò al mancje dome il silenzi So e de Zonte denant dal insult ae lenghe furlane dal guvier che al varès di movisi daûr e in cunvigne cu la Costituzion e no te sô violazion.
Par dutis chestis resons, il Comitât dai Garants dal Moviment Friûl al stime un fal storic la sô decision di ritirâ il partît tal lontan 1992, e che 20 agns di assence dal moviment autonomist storic dal palc di sene furlane e regjonâl a son, ducj lu puedin ameti, masse.
Salûts di rispiet.
Marco De Agostini
Segretari politic dal Moviment Friûl ■
