IL FERÂL. La tiere: scune e mari

La tiere, che par miârs di agns e à dât di mangjâ e di vivi al om e no dome, si cjate cumò simpri plui sassinade, sporcjade, violade, impestade, fracassade di ogni forme di sfrutament e speculazion. Te nestre civiltât industriâl e postindustriâl la tiere a lavorâle no rint cui sa ce, tant val alore lassâle a rosis e se al è pussibil fâle deventâ teren fabricabil, investiment imobiliâr, parcè che cussì e rint di plui, si à un capitâl plui consistent (al dîs cualchidun…). Ma o vin pierdût cussì dut il grant valôr reâl e simbolic che cheste grande mari e puarte in se. E il prin a rimeti al reste l’om.
pre Roman Michelotti
Il 25 di Avrîl a Spadolini i ricuarde la fieste de costituzion, al mont de Resistence la fieste de liberazion. Jo o soi plui prosaic: mi contenti di lâ cul pinsîr ae rogazion di sant Marc, cuant che si partive dal domo di Vençon aes sîs a buinore e si rimpinavisi sul Plan di sante Catarine compagnâts de rosade, dal aiar fresculin che ti faseve cressi ancjemò di plui, se al fos stât pussibil, la fam, e de sdrume dai sants, clamâts cul intono plui solen des melodiis aquileiesis par che a preassin cun nô il Signôr di vuardânus dal folc e de tampieste, de peste, de fam e de vuere, dal flagiel dal taramot e di dânus ancjemò une volte i prodots de tiere. Ancje a Rualp e a Treli o ai vût fatis lis rogazions, ancje se i prâts a jerin inmò indaûr. Ca jù no lis ai cjatadis parcè che o varessin dome di sfidâ lis machinis tal trafic ingjaulât de Pontebane. Lis rogazions a son une robe sacrosante, ma a àn di vê ancje une curnîs adeguade.
Al reste il probleme, dut intîr, de primarietât de tiere, de impuartance vitâl e pedagogjiche di un rapuart positîf cul mont naturâl.
No dîs che la religjon e puedi florî dome tal mont contadin o dome tai paîs. Mancjarès! O dîs però che la civiltât contadine e je la plui intonade al mont religjôs. O disarai di plui. Intun contest agricul, si è religjôs ancje se no si va a messe; intun contest di industrializazion sfuarçade, si riscje di no jessi religjôs nancje in glesie. Parcè che la religjon, che e à il compit di fânus sintî la presince di un Diu che no si viôt, e scuen ricori al sacrament, al segn, e la tiere e je dute un segn. E stant che ogni sacrament al è inadeguât a pandi il misteri, jo o preferìs i sacraments “naturâi”, che mi “svicinin” di plui.
In chest sens al è plui facil sintî la pasche intun prât e intun ort colorâts di vite che no intune glesie là che si gambie dome il colôr de tavuaie. Cussì il mont naturâl al è dispès plui “glesie”, lûc di Diu, che no un puar e frêt edifici matereâl.
A contat cu la tiere, l’om si sint grant tal semenâ e piçul tal scugnî spietâ une nassite che no je dome sô. Di chi un sens di umiltât che no lu umilie, di pazience che no lu scane e di sapience che e pues fâi dome ben. Parcè che la tiere e je sapience, storie, filosofie, art, scuele, glesie. Intun dut armonic, che al è chel che vuê si sint plui dibisugne.
La tiere e je mari e scune. Une mari gjenerose, che e da tant di plui di chel che e cjape. Une scune che no dismentee mai une semençute, par piçule che e sedi. In plui e à un orloi precîs par ogni stagjon e par ogni plante. Jo o pues dismenteâmi là che o ai plantât, ma no la tiere. La tiere e je segrete e discrete. Ce che tu i consegnis, lu ten cont cun grande delicatece, platantlu al voli curiôs e indiscret. E plate cu la stesse atenzion il tesaur plui preziôs e la semençute plui umile, cence diferencis.
La tiere, che e nudrìs la nestre gjenerazion, e ten cont ancje dal nestri passât. Di fat i oms a àn consegnade ae tiere no dome la lôr vite, ma ancje i lôr muarts. Come semence pe eternitât. Ogni semenâ al è un at di fede. Ma tal consegnâ ae tiere mari, scune e tombe cheste semence particolâr, la fede e rive al so moment plui alt e gratuît.
Il popul furlan al à vût simpri un rapuart vitâl cu la sô tiere. Se lu conservarà, al varà la plui grande briscule par un avignî seren e sigûr. ■
pre ANTONI BELINE
(publicade su Cirint lis olmis di Diu, n. 1 pagj. 54)