TV FRIÛL E CJANÇONS. La plui biele

Setembar: l’Istât al finìs, e la television nus fâs ancjemò sintî un pôc in vacance mostrant un pocjis di feminis in custum di bagn, cu lis finâls di Miss Italia. Un concors che al fevele di bielece cence braure, di feminis che a stan fermis li cence fâ nuie a fâsi cjalâ: il contrari di ce che a fasin in Friûl.
Par chel la tv furlane e rispuint a la kermesse cun Miss Patrie, il concors par elezi la miôr femine dal Friûl.
Come par Miss Italia, particolarmentri impuartant al è il moment da lis primis selezions, che però, par Miss Patrie no si fasin in discoteche, ma tai uficis, ta lis fabrichis e tai cjamps, specialmentri ta lis oris di straordenari, cussì si podin cjatâ lis furlanis veris.
Une volte cjatadis lis concorintis, al rive il moment di metilis a la prove.
Prin di dut, la sfilade in costum. Intîr? Bikini? No, in costum di cjargnele! E nuie “tac 12”, dome scarpets: une furlane e à di jessi sincere ancje te altece.
Lis concorints no àn di sfilâ suntune passarele (une furlane che e stâ sot dai rifletôrs? Impussibil!), ma devant di un diretôr dal personâl, par fâsi assumi.
Par fâ un pôc di spetacul pai spetatôrs a cjase, lis concorintis si podin esibî, propite come a Miss Italia, tune prove di cjant, di bal o alc dal gjenar (ta la version furlane, lis fantatis in gjenar a preferissin esibîsi tune prove di cjarçons o di un par doi).
Ogni concorinte si ricognòs pal so numar, tacât parsore dal costum, ma a Miss Patrie no si viodin numars come un, doi, vincjecinc e cuarantecuatri: parsore dai bolins di ogni concorinte tu podis lei robis come “cutuardis mancul doi”, “cuatri par trê mancul un”, “lidrîs cuadrade di sedis”, parcè che une Miss furlane no pues no savê fâ di cont.
Dute che vite chi, naturalmentri, nome par fâsi votâ di cjase. Nome che i vôts no son par telefon o vie internet: lis concorintis a àn di lâ a cjoliju di persone, cjase par cjase. In font, no si pues migo deventâ Miss Patrie cence fâ nancje un pocje di fadie, no?
E a la fin, al rive il moment plui impuartant: la premiazion. Miss Patrie e ven vistude cuntune corone di orâr (che e va simpri ben par boli lis cjastinis) e se i ven jù une lagrime e je subit scualificade, che une Miss furlane no pues migo vaî par monadis! ■
BETE DI SPERE