Une biele mostre dai costums tradizionâi e celebre
i 40 agns dal Grup folcloristic di Zampis
Te schirie di events par celebrâ il 40n di fondazion dal grup folcloristic LIS PRIMULIS DI ZAMPIS di Pagnà, e je ancje une iniziative pe zornade de Patrie dal Friûl.
◆ Tra il prin e i 11 di Avrîl, in onôr de fieste de nestre Patrie, e sarà a Pagnà une mostre itinerante di costums tradizionâi.
◆ La sede dal comun, i edificis scolastics e diviersis ativitâts comerciâls – sieltis daûr de disponibilitât e dai locâi plui adats – a deventaran dodis ponts di interès distribuîts su dut il teritori comunâl, cun ancjetantis cubiis di costums. Ogni cubie e sarà rapresentative di un paîs de nestre regjon.
◆ A saran duncje i costums di Pagnà, Cicunins, Cividât, San Pieri dai Sclavons, Maran, Davian, Claut, Pofavri, Vît, Tumieç, Vile di Cjargne e Darte.
◆ La plui part dai vistîts e je stade realizade intai agns ‘90, cul lavôr di chê che e jere la coreografe dal grup Franca Peresani su ricercjis detaiadis basadis sui studis aprofondîts di Lea D’Orlandi e Gaetano Perusini, e cul aiût preziôs di Gina Morandini e de associazion “Le Arti Tessili” che chê volte e veve sede a Tarcint.
◆ I costums di Pagnà e di Claut a son invezit stâts realizâts di pôc, cun ricercjis aprofondidis e studis fats dal stes grup intant de pandemie.
◆ Ogni cubie di vistîts e sarà completade di un QR-code che al permetarà ai visitadôrs di lei lis descrizions detaiadis e di visualizâ la mape dal paîs cu la dislocazion di chei altris costums.
◆ La iniziative e je patrocinade dal Comun di Pagnà e sostignude de Regjon, intune cun U.G.F. FvG union dai grups folcloristics furlans e UFI, Union folcloriche taliane.” ❚
