FURLANS, DIGJITAIT FURLAN. E-MARILENGHE. L’archivi online di Onde Furlane

Fasint un clic su “ARCHIVI” tal legri sît di Radio Onde Furlane o in vie drete ae direzion www.ondefurlane.eu/archivi a son a disposizion passe doicent regjistrazions di trasmissions fatis vie pai trente agns di storie de emitent.
La impuartance fondamentâl de ativitât di chest media furlan e je imagjinabil za cul lei i titui dai temis che a spartissin chescj documents: Leç, Letaradure, Minorancis, Lenghe, Musiche, Teatri e cine, Scuele, Storie, Ambient, Art.
Dut câs, si pues rivâ ae incision che nus interesse ancje sielzint une peraule-clâf, che a pues jessi sei il non di un ospit de trasmission o chel dal condutôr, sei l’an di origjin.
Chest servizi, mitût in vore cu la colaborazion de Agjenzie Regjonâl pe Lenghe Furlane, al fo mitût in vore tal mês di Fevrâr stât, ma cui prins mês dal 2012 al larà a insiorâsi di altris documents che a rivin dai archivis da la radio.
Scoltâsi a cjase la vôs di pre Antoni Beline o chê di Loris Fortuna (tant par fâ doi esemplis) riprodusint i file cu massime facilitât par interès, curiositât, studi o plasê al è un servizi gratuit che al scugne jessi laudât. Pensâ ai problemis che e vîf la radio tai ultins timps cul risi di dovê sierâ nus clame ducj a fâ alc.
Michele Calligaris