CULTURE – ART-Â. A Vile Manin in mostre i 50 agns dal Centri furlan arts plastichis

A son passâts cincuante agns di cuant che ai 12 di Fevrâr dal 1961, Candido Grassi al fondà, cun altris, il Centri furlan arts plastichis: une associazion di artiscj nassude cun chê di «meti in vore iniziativis culturâls e artistichis», tant che mostris, conferencis, publicazions, par valorizâ e fâ cognossi, dentri e fûr de regjon, lis oparis dai associâts. Par fâ un omaç ai artiscj locâi e par ricognossi il grant impegn di cui che al à guidât, tai agns, il Centri, e je stade inmaneade la mostre “Art contemporanie in Friûl-Vignesie Julie 1961/2011”, che e presente a Vile Manin di Passarian, fin ai 28 di Avost, il miôr de art regjonâl de seconde metât dal Nûfcent.
A son 256 lis oparis di piture, sculture, grafiche e fotografie in mostre – 48 di chestis a son esponudis ae galarie Sagjitarie di Pordenon –, fatis di 178 artiscj, ancje carinzians e slovens, sielzûts di une comission fra passe 2 mil e 600 lavôrs che a àn cjapât part aes 730 mostris inmaneadis dal Centri di vie Martignà a Udin, di bessôl o cun altris ents e grups, di ca e di là des Alps, dal 1961, an di fondazion, in dì di vuê. In sumis, une panoramiche dai miôr artiscj de regjon dai ultins cincuante agns: di Candido Grassi a Dino, Afro e Mirko Basaldella, di Zigaina a Mascherini, di Alviani a Celiberti, di Pizzinato a Predonzani. E ancjemò, Pittino, Ceschia, Nane Zavagno e tancj altris, che, cu la lôr partecipazion, a àn iluminât lis manifestazions promovudis e inmaneadis dal Centri in mieç secul.
Cincuante agns pençs di ativitâts, testemoneâts di 900 socis iscrits, 730 mostris ator pal mont, 2 mil e 700 artiscj in esposizion, plui di mil e 500 oparis te colezion, archivi e biblioteche digjitalizâts e vierts al public sore nuie. Numars impuartants che a disin cemût che i fondadôrs dal Centri (che cumò al è pressedût di Gianfranco Ellero), massime Candido Grassi, Vittorio Marangone e Giordano Merlo, a rivarin a meti in vore il fin dal statût, che al jere chel di promovi e valorizâ la art contemporanie dal Friûl e di creâ un puint artistic tra la nestre e lis regjons confinantis. Lu documente ben la sezion de mostre dedicade ai artiscj carinzians e slovens, che a colaborarin cul Centri sul imprin e po a forin presints dispès tes mostris internazionâls, ven a stâi Intart, Intergraf Alpe Adria e Incuintri centrieuropean. La esposizion e je insiorade ancje di une piçule antologjie che e memoree Anzil tal centenari de nassite.
Erika Adami