TERITORIS – INTERNAZIONÂL. Il Pape par catalan

Il fat che il Pontefiç al vedi fevelât ancje par catalan te cerimonie uficiâl che e à fat dal templi de Sagrada Família la novesime basiliche di Barcelone, al è un dai detais che a son deventâts plui impuartants pe stampe catalane e che invezit al è stât scuasi dal dut ignorât de stampe internazionâl.
Di fat, pal rest dai elements de visite te capitâl catalane, la presince dal Pape e je stade ben documentade, ma in gjenerâl vivude cun avonde distance.
CONTRADIZIONS IBERICHIS_ Ancje se Benedet XVI, partint pal viaç che lu à puartât a Sant Jacum di Galizie e a Barcelone, al à fevelât de Spagne tant che dal baluart european de cristianitât catoliche, in realtât la comunitât iberiche dal dì di vuê e je in sostance laiche e tra chês mancul leadis ai elements che a somein il çoc de politiche vaticane dai ultins agns: ancje chi il Pape al à fevelât di abort, intant che in Spagne la interuzion volontarie de gravidance e je un fat legâl e comun e la sperimentazion sui embrions e i studis gjenetics a son ae avanvuardie in Europe, e dal valôr de famee tradizionâl, cuant che invezit cheste struture e patìs une vore, come pardut tal mont ocidentâl, e si à ricognossût valôr legâl ai matrimonis tra omosessuâi (in dusinte di lôr a àn saludât Benedet XVI bussantsi ducj tal stes moment devant di lui).
IL BENVIGNÛT DE CATALOGNE_ Invezit il mont catalanist al à decidût di saludâ il vescul di Rome fasint viodi la sô muse e soredut la sô bandiere, dade fûr di volontaris a ducj i fedêi e curiôs che si devin dongje pes stradis di Barcelone. Il pape, de bande sô, nol à ignorât la identitât di cheste tiere, e al à doprât ancje la lenghe catalane in moments uficiâi, cun grande sodisfazion de int e dai politics: Josep Lluís Carod Rovira, esponent di Esquerra Republicana e vicepresident dal guvier regjonâl catalan, al à dite a clâr che «al à fat di plui pe lenghe catalane un pape todesc che al vîf a Rome, che no un cualsisei prin ministri dal stât spagnûl in cinc secui».
Cumò l’apontament al è pal Friûl: pape Ratzinger fevelaraial ancje par furlan?
Sandri Carrozzo