Riscuvierzi Orologio cumò: internet, bibliotechis e librariis

Se tu vâs su Spotify o su YouTube e tu digjitis “Alessandro Orologio”, tu varâs mût di scoltâ lis composizions, sacris e profanis, dal nestri compositôr di Dograve, che si è fat cognossi ben dilunc dal cors de sô vite, almancul inte Mitteleurope dal timp. E al è ben ricuardâ che diviersis sôs oparis a son stadis stampadis no dome a Vignesie ma ancje in Gjermanie, a Helmstedt, a Dresde, zirant cusì par lunc e par larc, e diviersis copiis des primis stampis a son conservadis in bibliotechis europeanis impuartantis. E vâl ancje la pene di ricuardâ che diviersis enciclopediis de musiche a dedichin un profîl biografic e bibliografic a Orologio, tant che l’impuartant “The New Grove Dictionary of Music and Musicians”, in plui che il “Dizionari Biografic dai Furlans” e un struc su “Wikipedia”. Diviersis oparis in partidure a son in rêt, lant su “International Music Score Library Project” e in “Choral Public Domain Library”.
◆ Lant ben a curiosâ, si scuvierzin ancje diviersis publicazion discografichis, no pocjis, di bande di grups strumentâi e vocâi dal forest, par un autôr furlan meritevul di jessi dentri ancje di une antologjie di une etichete danese che tai agns Novante e à produsût un vinîl di musichis dal timp di Fidrì II.
◆ Ma chel che forsit plui di ducj si è dedicât, in sens editoriâl, discografic e di stampe, a pandi la produzion di Alessandro Orologio, al è stât Bruno Rossi che, cu la Pizzicato Edizioni, tal cors dal timp, al à rivât a editâ la “Opera Omnia”, come che si intitule la imprese, componude di vot volums che a tegnin dentri lis “Cjançonetis” a trê vôs, ancje intauladis pal liût, i “Madrigâi” a cuatri, cinc e sîs vôs, i “Cantica Sion” a vot vôs, lis “Jentradis” a cinc e sîs vôs, e la sô produzion sacre che e je in cuantitât minôr a pet di chê profane.
Par sierâ il cercli de dedizion furlane ae cause de divulgazion de opare di Orologio, al è il cd dal titul “Alessandro Orologio, musico friulano del Cinquecento e il suo tempo”, cuntune sintesi ben resonade de sô produzion, cun tocs interpretâts di bande dal Côr dal Friûl-Vignesie Julie e dal Ensemble Strumentâl Orologio, cun mestri di conciert Davide De Lucia.
◆ O crôt che, par chei che no son dal mistîr, ma che a son istès cetant apassionât de storie de musiche furlane, o che a àn plasê di svicinâsi, al seti util prime di dut scoltâ lis composizions dai nestris autôrs, par fâsi la orele, metint dongje la leture di cualchi contribût che al fronti, magari ancje in curt, il periodi storic cun magari cualchi confront cu la opare di altris compositôrs dal timp. Par fâ un esempli, provait a scoltâ alc de produzion profane di Orologio, cualchi “Jentrade”, e daspò scoltait alc di Giorgio Mainerio, un bal dal so famôs “Il primo libro de’ balli” par dî, compositôr di Parme naturalizât furlan, che al jere dal stes periodi, nassût sedis agns prime di lui, e muart ancje prime di lui, tal 1582. Un confront che al risulte util par capî ue vore di robis, cence doprâ tantis peraulis, pluitost scoltant tancj sunôrs di chel lengaç universâl che je la musiche. ❚