Pe scuele furlane ancje chest an a saran a disposizion i fonts dal bant dedicât ae istruzion de Fondazione Friuli. Il bant istruzion de Fondazion Friuli al è stât presentât in Fevrâr in video conference. La dotazion dal bant e je di 600 mil euros e lis domandis des scuelis, sedi publichis che paritariis, a son stadis presentadis dentri dal mês di Març. Tal bant si conferme la poie ai progjets che a tocjin la alternance scuele/lavôr – ancje se penalizade des restrizions sanitariis –, i fonts par comprâ dotazions tecnologjichis cul potenziament dai laboratoris, chei pes furniduris sportivis, e il sostegn ai progjets pal potenziament des competencis linguistichis. Il bant 2021 al introdûs pe prime volte la poie ai progjets par contrastâ il disasi tra i minôrs e ancje tra i il personâl scolastic, che al è cressût propit par vie de emergjence sanitarie e dal distanziament sociâl.
◆ «La sospension des lezions in presince – al à dit il president de Fondazione Friuli Giuseppe Morandini – e la rivoluzion inviade cu la Dad a àn manifestât di une bande la mancjance di dotazions tecnologjichis e di chê altre a àn  aumentât lis formis di disasi fra i minôrs. Cun chest bant o volìn sostignî iniziativis indreçadis a frontâ il contest cun rispuestis rapidis». Ae presentazion dal bant e jere ancje la assessore regjonâl pe formazion e pal lavôr Alessia Rosolen: «La pandemie – e à dit – e à savoltât il concet di didatiche, imponint di imagjinâ modei cence la presince fisiche tai spazis tradizionâi: l’obietîf al è fâ in mût che chescj mês di Dad a sedin propedeutics a proietânus bande une gnove dimension de istruzion dulà che lis aulis scolastichis e i laboratoris virtuâi a convivin garantint il dirit al studi a ducj. Il 2020 nus lasse in ereditât, tra chês altris robis, la cussience che la pandemie e à procurât feridis profondis e dolorosis tal setôr de istruzion, e che a coventin invistiments consistents». Ancje par chest bant 2021, la Fondazione e pues contâ sul supuart di Intesa Sanpaolo: «In graciis dal font Impact – al à dit – Intesa Sanpaolo e à metût in cjamp diviersis iniziativis par lâ incuintri aes fameis e ai students, che par vie de emergjence sanitarie a àn scugnût cambiâ il lôr mût di imparâ e di stâ daûr aes lezions». ❚

Piero Cargnelutti