I 103 agns di Eva Palmano

Eva Palmano e je nassude a Maranzanis, frazion di Comelians, ai 13 di Març dal 1917. Chest an e à finît 103 agns e e dîs “O ‘nd ai passadis cuatri… displasês e di dut. Ma la vite e je cussì: impegnative e fate di tancj sacrificis. O soi nassude intune famee di biade int. O vevi une sûr e 6 fradis, e cumò o soi jo la uniche inmò vive.”
◆ Eva e conte che la sô infanzie e je stade dificile parcè che “E jere tante miserie. Di frute o zuiavi cui claps: no vevin la robe di cumò. Dopo o soi lade a imparâ il mistîr, a fâ “la magliaia”, aì tal paîs. Mi soi metude a fâ maiis a machine, e la situazion in cjase e je lade in miôr: o lavoravi benon e mi soi fate cognossi. La lane le compravi a Comelians e lis maiis lis fasevi a Maranzanis.”
◆ Un tic indevant cu la etât, Eva si è maridade e e je lade a vivi a Dartigne: “O ai cognossût il gno om, Marino De Monte, parcè che al vendeve articui di corean, al faseve il rapresentant e al zirave dut il Friûl. Al vignive ancje in Cjargne. Lui al jere di Dartigne. Mi soi sposade tal gno paîs, e dopo o soi vignude achì e achì o soi restade. O vin fate une biele gnoce: o vevi tancj invidâts, e musiciscj dal paîs a àn sunât par dut il timp. E je stade propit une biele fieste. O vevi parecjade la dote: ricamât e cusît bleons e robe che e covente ogni dì. Cuant che il gno om al è muart, mi soi fermade achì.”
◆ A 60 agns Eva e à fate la patente, passantle al prin colp, e e à menade la machine fintremai a 90 agns. E cuant che si domandi a Eva cemût che e passe vuê il so timp, e dîs “Cumò no lavori tant: lis gjambis no mi tegnin sù. O ai la badante, e cussì le cjati pronte.” Ma ancje se e à la badante, Eva no piert un colp e e rispuint fintremai al telefon di cjase!
◆ Sui agns passâts, e su ducj i mudaments che e à podût viodi, Eva e pense che “al è cambiât un grum il mont, in confront di une volte. Al jere miôr une volte. E je cambiade la vite. Une volte, la sere, dopo vê lavorât dut il dì, si cjatavin in file: o cjantavin, o balavin e si divertivin. E jere miserie, ma o jerin contents, e no jerin dutis lis modernitâts di cumò. Vuê la int no je mai contente. O vin dut e no vin nuie. Jo no stoi ben.”
◆ Il segret par mantignîsi tant ben a 103 agns? Eva e rispuint “O soi stufe. O soi strache e no stoi tant ben. O stenti a stâ in pîts. Il Signôr no mi viôt tant e mi à lassât deventâ vecje cussì…”. E dopo e pense un moment e e dîs “ma al tocje simpri sperâ e mai lassâsi lâ!”
◆ O zontarès che e je une fortune rivâ a 103 agns cu la luciditât di Eva. Mi plâs pensâ che forsit un pôc di merit lu an lis lidrîs cjargnelis… ❚