Se il Football Club Barcelona si presente cul sproc “mes que un club” (plui che un club), si pues dî par sigûr che Onde Furlane e je “plui che une radio”. Cun di fat, la ativitât di comunicazion e di informazion radiofoniche e je stade compagnade fin dal principi di tantis altris azions, che si son incrosadis in maniere positive cui gjornâi radio e cu la ufierte dai palinsescj, e che si son disvilupadis inte societât furlane, in cetancj setôrs diferents.
Par chel, la storie e la atualitât di Onde Furlane si pues leilis no dome doprant la categorie de radio, ma ben ancje cun riferiment ae produzion culturâl, ae mobilitazion sociâl, ae ativitât imprenditoriâl e salacor ae politiche, là che, tra elaborazion teoriche e azion concrete, la radio e ce che si à disvilupât dongje e daûr di chê a àn cjapât sù une lôr subietivitât specifiche, ancje se “no convenzionâl”. Cheste vocazion, che si pues ricognossile bielzà leint cualchi bocon dal statût de cooperative, si palese in cetantis ocasions.
◆ La radio libare dai furlans e il teatri
Tra azion culturâl, promozion linguistiche e rivendicazion di dirits, un setôr di grant interès de radio, fin dal principi de sô ativitât, al è chel dal teatri popolâr in lenghe furlane. La cuistion e ven frontade tal 1982 cuntun scandai/censiment par cure di Guglielmo Pitzalis e cuntune cunvigne fate a Martignà; po dopo, tal 1983 cul libri “Teatri par un popul” e cuntun altri confront public, inmaneât li de Universitât, e ancjemò tal 1984, cuntune altre cunvigne li de Provincie di Udin. Chel percors nol rive a coinvolzi lis istituzions, ma al sburte la int a organizâsi par cont so, cu la creazion tal 1987 de ATF (Associazion Teatrâl Furlane), che in principi la sô sede e je propit li di Onde Furlane.
◆ Autoguvier e dirits linguistics. La radio militante
A son diviersis lis bataiis civîls e politichis promovudis de Radio, de racuelte des firmis (50 mil) a pro di une leç di tutele des minorancis linguistichis che e meti in vore l’articul 6 de Costituzion taliane, ae iniziative popolâr pe costituzion de regjon Friûl (cence Triest), cun 93.541 adesions tiradis sù jenfri il 1982 e il 1983, fintremai aes mobilitazions plui resintis a pro dal ricognossiment formâl e sostanziâl dai dirits linguistics, sedi a nivel regjonâl e statâl che intun contest european e internazionâl, là che Onde Furlane e disvilupe relazions e colaborazions rivendicativis e operativis, par esempli in conession cul Ufici European pes Lenghis mancul Dopradis (EBLUL) vie pai agns Otante e Novante, o ben inte partecipazion ae elaborazion dal Protocol di Donostia, tal 2016.
◆ Une radio osmotiche, une radio usmatiche
Chel di Onde Furlane al è un cantîr simpri in vore e simpri viert. La Radio e cree opinion, e clame dongje int, e ven scoltade e in chel istès si met in scolte di ce che al nas e che al cres inte societât. Il teren di cheste osmosi al è sedi chel des mobilitazions e des rivendicazions sociâls, ambientâls e politichis, che chel des elaborazions teorichis e des produzions artistichis e culturâls. La fin dai agns Otante e i prin agns Novante a son segnâts di une grande bulidure di ideis e di iniziativis. Tantis di chês a saltin fûr dal moviment di Usmis, un grup di personis che, incrosant culture e filosofie politiche e lavorant jenfri scriture, musiche, mostris, events e videos, al disvilupe une maniere gnove di vivi – e di rivendicâ – la identitât furlane, e di doprâ la lenghe furlane: cuntune cussience ancjemò plui dinamiche, moderne e “planetarie”. Chê esperience i darà ae radio energjiis gnovis e fintremai une fuarce gnove, che si le ricognòs ancjemò in dì di vuê.
◆ Editorie, musiche, audiovisîfs, servizis linguistics, migrazions e events
Onde Furlane e va plui innà de radio dilunc di diviersis stradis: chê de creativitât e de editorie, cu la produzion di libris, fumuts e audiovisîfs e cu la etichete discografiche Musiche Furlane Fuarte; chê de comunicazion, de produzion dal prin telegjornâl par furlan al disvilup des risorsis su (e cun) internet, dal streaming a Facebook ae App; chê de linguistiche aplicade, cul prin coretôr ortografic e cul inviament dal percors che al puarte ae realizazion dal Grant Dizionari Bilengâl Talian Furlan; chê de atenzion particolâr pal Friûl pal mont e pal mont che al rive in Friûl; chê dai events culturâi ator pal Friûl e des manifestazions di nivel internazionâl, tant che Suns e Suns Europe. ❚
