Fabian Ros, La invenzion dal Stât, Udin 2017

“In chescj timps li che popui e nazions a cjapin cussience de lôr identitât, che a mostrin di cjapâ in man il lôr destin, al ven fûr simpri di plui a clâr che a fâ cuintri des nazions storichis e de identitât dai popui no je dome une politiche centraliste e antinazionalitarie ma la forme Stât stesse”.
◆ Cussì l’incipit di cheste gnove vore di Fabian. Lis pagjinis a son mancul di cent e cincuante ma tant penzis che al è dificil furnî une idee complessive, par vie che lis pistis di leture a son tantis. O segnalìn dome cualchidune:
– il Stât, cemût che lu intindìn nô, nol è simpri esistût: al à vût un inizi e al varà une fin.
– Intune societât cence Stât (come in te Ete di Mieç), la vite de int e jere dal dut diferente di chê di cumò: no jere une monede uniche, nol jere un esercit regolâr, il dirit si basave su la consuetudo e no suntune leç erga omnes, no esisteve une paie stabile pai lavoradôrs e v.i. Al jere un mont policentric li che l’om al viveve in societât, no dome te societât (p. 43).
– Cuant che si fevele di Imperi roman bisugnarès pensâ che il tiermin ‘Imperi’ al veve une acezion diferente di chê corinte.
– Lis jacqueries, vâl a dî i riviei che a son sclopâts tacant dal secul XIV un pôc pardut in Europe, no partivin simpri dal popul, anzit dispès a jerin saborâts dai nobii, che no sopuartavin il slargjâsi dal podê centralizât.
– Un rûl une vore impuartant inte costruzion dal Stât moderni lu àn vût lis trê confessions religjosis post riforme (calvinisim, luteranisim, catolicisim) e pensadôrs tant che Marsili di Padue, Macchiavelli, Bodin, Althusius, Hobbes, Locke, Rousseau (par ognidun di chescj, une analisi puntuâl).
– La Rivoluzion francese e à butât jù la monarchie, ma di fat e à cjapât su di se la forme centraliste dal Stât che propit la monarchie assolude (cun Richelieu e Mazarin) e veve fondât.
Jenfri mil altris sugjestions che il libri al ufrìs, e va  segnalade la tesi interessante che, intal superament e inte trasformazion de idee stesse di Stât, e varà une precise funzion la lenghe. Ma “Une lenghe e cres il so status dome se i contignûts che e je in stât di esprimi a proietin e a progjetin une vision altre dal mont” (p. 134). Che al è propit ce che Fabian al à fat cun cheste sô opare e cun chês altris che al va indenant a dâ fûr come la ultime jessude, “La art e lis sôs funzions”.  ❚