Zovins, informazion e politiche

Lu savìn ducj: cuant che si rive ae etât maiôr si scuen, cui plui cui mancul, cjapâ in man lis propriis responsabilitâts, tant che fâ la patente, vê la pussibilitât di comprâ alcolics intai negozis o adempî al dirit/dovê di vôt. Propit cussì, il vôt…
Cuant che si àn disevot agns e si è ancjemò a scuele, si è ducj clamâts a dî ce che si pense de sene publiche politiche taliane, cul vôt. Bisugne però tignî presint che tai agns de scuele –  massime secondarie – l’argoment cjalt de sene politiche taliane e europeane al ven tocjât forsit un pâr di voltis, al plui un tant di voltis che si puedin contâ sui dêts des mans! Partìn di un esempli di nature personâl: cuant che jo o jeri ancjemò a scuele o varai fevelât di politiche sì e no cinc voltis, e mâl. Domandant a amîs e cognossints, il risultât al è compagn. Ce biel sens critic che a svilupin i zovins, cussì!
◆ Al è clâr che dopo no si pues lamentâsi dal fat che no vedin lis ideis claris o che no vedin voie di dî la lôr: nancje jo no me sint di fevelâ suntun argoment cuant che no lu cognòs!
E cuant che a son i zovins che a cirin informazions, un pôc pierdûts, a van tantis voltis a finîle su doi ambients: la famee e i social network.
◆ Il prin ambient, chel de famee, al è un pôc plui sigûr, ma ancje se o sai che e je une biele robe discuti in famee, mi fâs cualchi scrupul su la obietivitât de situazion. Mi spieghi miôr: intune famee al è tant probabil che a sedin opinions politichis tant consolidadis che un fantat si sinti obleât cuasi in automatic a seguî lis ideis dai gjenitôrs/fradis/nonos/no sai ce. Magari e je une vision un pôc estremizade, ma di no sotvalutâ: al capite dispès.
◆ Chel altri puest là che un fantat al va a cirî rispuestis pai siei dubis, al è chel dai social network. No pensi che al coventi ricuardâ ducj i scandui sucedûts, par esempli, cun Facebook (ma a puedin jessi ancje Instagram e Whatsapp). Chest colòs al conte, cun chês altris plateformis, miliarts di utents: je une robe enorme. Un dai scandui plui grues, tant par nomenânt un, al è stât chel di Facebook-Cambridge Analytica: Facebook – leteralmentri “libri des musis” – al vendeve i dâts in teorie privâts dai tancj utents (milions). Chescj dâts, dopo, a jerin doprâts par motivazions di propagande politiche, par esempli intant de Brexit o de elezion dal President Donald Trump in Americhe. Lis opinions dai utents, in base ai dâts privâts, a jerin influençadis de publicitât e dai contignûts conseâts. Savint dut chest, cemût podìno lassâ  che i zovins – e ancje i vecjos – si informin su la politiche su chestis plateformis e vê la cussience nete?  ➤
(al va indenant sul prossim numar)
https://www.lapatriedalfriul.org/?p=24239