Marzia Spessot, di Cormons, e je a cjâf dal Pront Socors dal Ospedâl San Raffaele di Milan. Une struture che, par lustri, no à bisugne di presentazions. «Dopo dal liceu a Gurize o soi stade ametude a Pisa a la Scuele Superiôr Sant’Anna, federade cun la Normale. E finide la Universitât o soi vignude a Milan». Un Pront Socors al è in prime linie pe emergjence dal Coronavirus e i domandi il sô prin ricuart a proposit «Mi visi une date: ai 25 di Fevrâr o vin scuviert il prin malât. Une persone che no veve i sintoms: i vin fat il tampon parcè che si faseve a ducj chei cu la fiere. E la sorprese che o vin vût. E mi visi l’inizi de crisi: dôs setemanis dopo, a colp, la rivade continue di câs infetâts grâfs ». Si fevele di 25-30 câs di insuficienze respiratorie par Covid in dì, rispiet a une medie normâl di 2-3. «Al è stât frustrant tal imprin che no savevin cemût curâju: o vevin dome cualchi fumose indicazion de Cine.»
◆ «La piês robe di cheste malatie e je l’isolament dal pazient. Nô o jerin i unics tramits tra lôr e i parincj. Dute int che si rindeve cont di ce che i sucedeve, che però e veve di restâ li, bessole. E lis tantis telefonadis che o ai vût di fâ ai parincj… Che jo o soi ancje usade a dut, vint vût par agns chest rûl. Ma mai cuntune intensitât e frecuence cussì. Mai. Une robe impressionante.»
Une situazion che cumò si è bonade «Di dôs setemanis no vin plui câs di mandâ in intensive, e chei gnûfs si rive a curâju. Cumò si à rivât a meti adun dai protocoi bogns».
E je stade dure «Mi sveavi la matine e o lavi a vore, par rivâ la sere a cjase che tantis voltis pe strachece nancje no cenavi. No ai vût timp di vê pôre: l’unic pinsîr al jere frontâ la situazion, e vie».
◆ A Marzia prin di saludâsi i ven iniment alc e mi zonte, di colp «E une altre robe! Cun lis protezions che vevin di meti intor, mi visarai simpri de sensazion continue di mancjance di aiar».
Cumò, biadelore, si à tacât a tirâ il flât. ❚
Dree Venier
