La storie di Daniele Cimador, che al è l’unic om
a vivi fìs tal borc de Val Pesarine là che cumò
a vegnin justâts i stai che a puartin simpri plui turiscj
rias si cjate intal comun di Prât di Cjargne e al è un puest un grum carateristic e biel. L’unic abitant al è Daniele Cimador che di cirche 13 agns si è stabilît achì e che ogni dì al scombat par vuardeâ e par tignî in dret cheste borgade di stai. Lant a racuei tal scansel dai ricuarts di cuant che al jere frut, Daniele si impense “dai vecjos che a vignivin achì in Istât par lavorâ la tiere e par fâ fen. In Primevere e di Autun a puartavin lis vacjis a passi – prime e dopo che e jere stade cjamade la mont – par che a mangjassin il fen fat achì. Il fen che al restave al vignive mandât jù a Truie cu lis teleferichis, indulà che a jerin i cjôts des vacjis. Jo mi impensi che o vignivi sù di piçul a seâ cun mê mari e di Istât o stavin a durmî achì, sore la tasse dal fen. O vignivin sù cul zei e si puartavin daûr la çacule cun dentri pan e salam, e o mangjavin sot di une melarie. A jerin i vecjos che a seavin e di zoventût, a lavorâ, e jere la nestre famee e altris doi zovins. O vevin 12-13-14 agns, fin a 18 agns e dopo o sin lâts ognidun pe sô strade. La robe plui biele che mi impensi, e jere la musiche cuant che si rivave sù a buinore: a jerin tancj vecjos che di ca e di là dai stai a guçavin lis falçs. Dal sun, tu savevis za cui che al stave seant! Chês robis mi mancjin tant e no tornaran plui: vuê a son disbaraçadôrs, machinis di seâ… Orias al è restât vîf cussì parcè che la strade e je rivade tal ’88-’89. A pene rivade la strade, gno pari al à sistemât il stali achì par podê vê une stanzie par fermâsi a mangjâ a misdì, invezit di stâ ator pai prâts. Fat chest, par sfortune no sin plui vignûts sù cu lis vacjis.”
◆ Orias vuê al è cambiât. Daniele al è unic che al vîf culì e, come che al dîs lui, “o ven achì a durmî parcè che o fâs l’artesan e o soi fûr dut il dì. O ai decidût di vignî a vivi chi invezit di lâ a paiâ un fit e cussì, a 35 agns, o ai decidût di tacâ a sistemâ il stali, ancje par che al resti alc. Orias di 30 agns fa e Orias di vuê no jentrin nuie. Vuê al tocje stâ atents dai turiscj e de int che e rive sù e che e ven a viodi, che ti fâs cualchi domande e cualchi volte ancje che ti intrighe. Une volte achì si lavorave, no si vignive a cjalâ il clap, la planele. Une volte e jere une risorse, vuê e je deventade une robe turistiche. Al è biel ancje cumò, e par fortune che cualchidun si è inacuart di chest. Al è 13 agns che o sei lis corts, che o ten di cont un pôc dut (mi è capitât di lâ par un mês in feriis e prime di lâ o vevi seât dut, e cuant che o soi tornât, nissun al veve fat nuie). Se no tu tegnis di cont… no vuei nancje imagjinâ se no fos achì… a saressin i sterps fûr dai stai. E par fortune che aromai no son trops prâts di seâ… Une volte si seave fin sot dai crets, cumò tu viodis che il bosc al ven simpri plui indevant. O volarès che ducj i proprietaris di chest lûc si metessin dongje par cirî di tignî di cont chest biel puest.”
◆ Ciert, nol è stât un percors sempliç vivi culì, ancje parcè che la aghe e la lûs a son rivadis tal 2008, dopo che Daniele al jere za di 3 agns che al viveve chi, e tes zornadis di Invier al jevave adore cu la pale pronte par palâ nêf ingrumade devant de puarte de cjamare. “Cu la aghe e la lûs – al conte – a àn tacât a meti a puest cualchi stali, e il comun al ven a dâ une netade. Achì, tai ultins timps, a son stâts zirâts cines; tal 2018 a àn picjât, su cualchi mûr di stali, panei cu lis poesiis di Pierluigi Cappello… duncje o viôt Orias in cressite, cun bielis robis. O soi content di cheste valorizazion, però vuê si valorize tant il stali, il puest, la plaçute, lis rosis che a vegnin metudis, ma al sarès di valorizâ dut il teritori. Al è dibant pensâ di valorizâ il mûr e no mantignî il bosc. L’invît al è chel di vignî a Orias in ponte di pîts… come ducj i puescj di mont, a un, se lu sint dentri, i da tant. Dome cjalant lis pieris, i tets, si inacuarzisi de int che e à lavorât metint passion par fâ lis robis; i vecjos che a àn scugnût crodii parcè che ur coventave, e nô o scuegnin tignî dut di cont pe storie che e je daûr. Si à di rispietâ chê int che e à sgjavât la tiere e che e à metût in pîts dut… no si pues lassâ lâ la robe malementri. Jo o speri in chest. Il gno cûr al è achì.” ❚
