Sfuei Mensîl Furlan Indipendent
Archivi de Patrie

«Furlans sveaitsi e doprait il vuestri cjâf!»

............

DI MAN çAMPE: PRE PLACEREAN, PRE MARCHET E PRE BELINE INTERPRETÂTS DI FRANCESCO MANSUTTI, RICCARDO GARLATTI-COSTA E FEDERICO GARLATTI COSTA TAL CINE PREDIS, LA NAZIONE NEGATA”
DI MAN çAMPE: PRE PLACEREAN, PRE MARCHET E PRE BELINE INTERPRETÂTS DI FRANCESCO MANSUTTI, RICCARDO GARLATTI-COSTA E FEDERICO GARLATTI COSTA TAL CINE "PREDIS, LA NAZIONE NEGATA”


Tal so ultin lavôr, Massimo Garlatti-Costa al fevele di pre Marchet, pre Placerean e pre Beline: trê erois de storie furlane

Predis, la nazione negata” al conte la storie dal indipendentisim furlan intal Nûfcent, traviers des figuris di trê predis furlans combatents – pre Bepo Marchet (1902-1966), pre Checo Placerean (1920-1986) e pre Antoni Beline (1941-2007) -, che a àn cirût di sveâ il lôr popul par fâi tornâ a cjapâ cussience de proprie storie, culture, lenghe, ma massime de proprie identitât. Trê predis plui di azion che di contemplazion, plui esperts di politiche che di mistiche. «Il lôr messaç al è ancjemò vîf e ducj, ognidun di noaltris, o podìn cjapâ sù cheste ereditât e fâle nestre», al dîs il regjist Massimo Garlatti-Costa.

__

Il Friûl e je une nazion mai nassude, il so destin al è di jessi un mont par so cont, no par se stes. Cun chestis peraulis si vierç il cine. Ce isal che al à impedît al Friûl di jessi une nazion?

«Il tiermin “nazion” al derive dal latin “natio”, “nassite” par furlan, e si riferìs a une comunitât di individuis che a condividin carateristichis comuns tant che lenghe, lûc gjeografic, storie, tradizions, culture, religjon e etnie. O crôt che i furlans a vedin dutis chestis carateristichis. Ce che forsit ur mancje e je la cussience di vêlis. Cheste mancjance di cussience e nas te storie furlane, partint dai secui de dominazion venite par sbrocâ tal Votcent e tal Nûfcent dulà che e je vignude a mancjâ une classe dirigjente, di inteletuâi e di politics, che e vedi fat un percors di autocussience identitarie come che al è stât par altris nazions europeanis in chel stes periodi. Al sarès di domandâsi cemût mai che i furlans a àn rivât a mantignî la cussience di popul che a àn cumò».

__

cemût mai?

«Forsit parcè che a àn, dentri di lôr, une sorte di resistence, di fuarce di adatament, une cussience scuasit familiâr, tribâl, peade soredut ae lenghe che e je veicul fondamentâl di apartignince».

__

Ma no àn cussience di se tant che nazion, le dinein.

«Sì – il sottitul dal film, “la nazione negata”, al è just di atribuîlu ai furlans -, e chest al fâs pensâ e soredut al fâs stâ mâl. Il dineâ al è un dai prins mecanisims di difese dal om, un al dinee parcè che nol vûl acetâ une situazion o une realtât che al cjate dificile di frontâ o di elaborâ. Al è un mecanisim psicologjic cognossût e studiât. Une vore di furlans, secont me, a dinein la cuistion identitarie, parcè che e je dificile di frontâ e inalore a decidin in maniere cussiente o incussiente di no frontâle e a fasin buine une identitât plui facile, plui “acetade” come chê taliane».

__

Pre Bepo Marchet, pre Checo Placerean e pre Antoni Beline a àn cirût di sveâ il lôr popul par fâi tornâ a cjapâ cussience de proprie identitât. A chest impegn di une vite tu âs decidût di dedicâi un cine. Parcè?

«Il Friûl nol à vût “erois furlans” ricognossûts, nol à vût, te sô storie, personis che a vedin lotât e scombatût pal Friûl, pe sô lenghe, pe storie e pe culture e pai dirits dal so popul. Jo o crôt che pre Bepo Marchet, pre Checo Placerean e pre Antoni Beline lu vedin fat e lu àn fat te maniere che ur jere pussibile, dedicant dute la lôr vite a cirî di sveâ la lôr int e judantle a cjapâ cussience. A rapresentin une sorte di percors dal Nûfcent furlan, partint di un Marchet che al met fondis ae culture e ae lenghe, passant a un Placerean che al sburte cun dute la sô fuarce par fâ cjapâ cussience al so popul e rivant a un Beline che al scombat cul nemì forsit plui grant e pericolôs di simpri: la globalizazion».

__

Cualchidun al disarà che Predis al è un cine documentari par nostalgjics, altris che al è sovranist, che intal mont di vuê, globalizât e omologât, al è dibant tirâ fûr discors di cheste fate. E, invezit, al è propit il mont di vuê che, par paradòs, al fâs capî la atualitât straordenarie dal messaç di pre Bepo Marchet, pre Checo Placerean e pre Antoni Beline, che al vâl pal Friûl, ma no dome…

«Peraulis come “sovranist” a son peraulis dal timp di vuê, creadis ad hoc par sburtâ la int a pensâ intune maniere precostituide e creadis par vê tal lôr significât une conotazion politiche e sociâl che e met un cuintri di chel altri. O pensi che Marchet, Placerean e Beline a varessin dite: “Furlans sveaitsi e doprait il vuestri cjâf”. Un Friûl che al cîr une sô dimension disfantsi intal mont globalizât al è un Friûl che al mûr, parcè il mont globâl al è un mont cuntune culture dominante e un numar limitât di lenghis e nol è il mont che o vuei vê pal gno Friûl».

__

Ce varessino di fâ i furlans?

«A àn di cjapâ une decision su ce che a vuelin jessi. Decidi di pierdi une storie e une culture milenarie nol è facil e fâlu cence savê di fâlu al è ancjemò piês».

__

Ise dome une cuistion di responsabilitât personâl, cheste incussience?

«Leint Marchet e ce che al scriveve lui tal 1950, Placerean tai agns ‘70 e Beline tai agns ‘90, un si domande ce che o vin fat di 70 agns incà pe scuele, pe politiche linguistiche, pai media e pai dirits dal grup etnic e linguistic furlan. Il furlan al sorevîf dome par une sielte familiâr e individuâl, e al sarà simpri di plui cussì».

__

Come par Missus, chest documentari nol è sui predis, su la glesie. La cuistion e cjape dentri la identitât di un popul. In chest sens, cuâl isal, par ognidun di chescj trê predis, il messaç plui fuart che al à lassât?

«Missus al è un film sul dirit di preâ inte proprie lenghe, e su di une bataie, chê dai predis di Glesie Furlane, che e va indenant di passe 45 agns. Predis al è un documentari sui predis che a àn dade la fonde a Glesie Furlane e no dome, parcè che i predis a son stâts i inteletuâi dal popul furlan, i unics che a vevin studiât e, jessint dal popul, a podevin dâ cussience ae lôr int. Marchet al è stât la fonde, la cussience inteletuâl dal popul furlan; Placerean al è stât la cussience politiche, chel che al à regalât un sium, chel che al à dite ce che nissun furlan al veve mai sintût prime. Beline al à cirût di fâ capî ae int i pericui de globalizazion, e al à visât i furlans che al jere rivât il moment di sielzi ce jessi. L’element straordenari al è che ducj i trê a vevin anticipât di une vore di agns i lôr timps, a vevin viodût i pericui che al podeve puartâ l’avignî e a vevin dât soluzions alternativis, ma magari cussì no no son stâts scoltâts ni inte lôr vision de politiche istituzionâl ni di chê linguistiche».

__

Intal cine, inte part di finzion, tu âs decidût di contâ pre Marchet, pre Placerean e pre Beline tant che predis zovins. Parcè?

«Il gno obietîf al è di contâ i trê Predis tant che erois de storie furlane e fâ sintî ai spetatôrs che i trê predis a son vîfs ancjemò in dì di vuê soredut cun dut ce che a àn scrit e fat. I erois, citant il cjantautôr Guccini, a son simpri zovins e biei, e alore o ai pensât di fâ viodi tal film Marchet, Placerean e Beline cuant che a jerin ancjemò zovins, tal ‘seminari. Chest no dome ju fâs viodi intune forme diferente e plui vive, ma al da al spetatôr la sensazion che i trê predis furlans a jerin dai predestinâts».

__

Predis al è un cine in blanc e neri, ma cun inserts a colôrs suntun Friûl che nol è plui, cul voli di une machine di prese in moviment. Cemût mai cheste sielte?

«O ai volût filmâ Predis dut in blanc e neri, parcè che al è il Friûl di cumò che, rispiet al Friûl che a varessin volût vê i trê predis dal film, al è un Friûl cence lûs, cence colôr, ma che al à ancjemò une anime. Dentri dal film une “cameracar” cun ripresis in 8mm filmadis di dentri une machine, nus fâs viodi il Friûl dai agns Setante, un Friûl cun ancjemò la sperance di podê jessi “nazion”, e alore chês ripresis lis ai voludis lassâ a colôrs».

__

Ce aial copât chê sperance?

«Il ‘68 al è rivât ancje in Friûl e cu la mozion dal clericât dal ‘67 i predis a vevin domandât un disvilup sociâl pal Friûl, e dât il vie a une vore di bataiis, come la bataie pe Universitât furlane, la cuistion des servitûts militârs e vie indenant. Il taramot dal ‘76, inte tragjedie, al à metût adun i furlans e lis lôr cussiencis, ma cheste energjie e je durade dome il timp de ricostruzion “materiâl” dal Friûl».

__

Significatîf al è ancje il contest li che tu âs ambientât il documentari: un Friûl, pal plui, di nêf e fumate. Parcè?

«Al è un Friûl dismenteât, ma eterni, un Friûl di aiar e di monts, di mâr, di flums e di prâts. Al è il Friûl che mi plâs a mi, un Friûl che al ten di cont la sô tiere e che nol è ancjemò cimentificât e doprât cence cussience».

__

Intun mont li che la globalizazion e cîr di distudâ lis lenghis e lis culturis diferentis in non de omologazion, il messaç dai trê predis furlans al è ancjemò vîf e – cun chestis peraulis il cine si siere – al è simpri plui fuart e al spiete dome di jessi scoltât. Di cui? Cui isal che al pues cjapâ sù la ereditât di chescj trê predis?

«Il messaç dai predis furlans, come pal film Missus, cussì ancje par Predis, al è ancjemò vîf e ducj, ognidun di noaltris, o podìn cjapâ sù cheste ereditât e fâle nestre. Forsit cumò che si scolte un pôc ducj, soredut chei che i sorestants nus disin di scoltâ, al sarès il moment di fermâsi a pensâ e stâ a sintî chei che a àn dimostrât cun ce che a àn fat te lôr vite, ce che a valin».

__

Dal pont di viste personâl, ce ti aie lassât cheste esperience?

«Personalmentri o soi stât une vore content e braurôs di contâ la storie di chescj trê grancj Erois furlans. Al è un film che o varès tant volût fâ di zovin e biadelore cumò o ai realizât chest sium. Predis al è un film sul Friûl che, come ducj i miei lavôrs, al cîr di fevelâ di un Friûl diferent, che nol è contât dispès, parcè che al è un Friûl dificil di frontâ, un Friûl contât ae int pe int».

__

Ce ti auguristu par chest lavôr?

«O speri che Predis al fasedi cjapâ voie ai spetatôrs di lâ a cirî dut ce che a àn lassât chescj trê grancj inteletuâi furlans. Viodi un film diferent al jude simpri, soredut se al fevele de tô tiere e ti puarte a cognossile intune maniere libare».

__

Predis si insuaze intun progjet articolât, tacât cun Missus. Cuâl isal il so intindiment? Cemût laraial indevant?

«Tal 2015 o vevi prontât une trilogjie cuntun titul complessîf che al jere il sproc di Glesie Furlane: “Restâ cu la Int”. Il prin film al voleve contâ il moment atuâl dal Friûl, e o ai zirât Missus, l’ultima battaglia. Il secont film al vûl contâ il Nûfcent furlan traviers la vite di trê predis che a àn dedicât il lôr jessi ai furlans, e chest al è Predis, la nazione negata, une sorte di prequel di Missus. Il tierç film previodût al è Aquilee, la nascita di un popolo, un film che al va ancjemò plui indaûr, ae fonde dal Friûl e dai furlans. Magari cussì no, a chest tierç film e je stade gjavade une poie di supuart economic une vore impuartante. Dut câs, imparant dai predis furlans, o larai istès indenant, sigûr di realizâlu intai prossims agns».

__

Al pararès che dome i oms di glesie, in particolâr chei di Glesie Furlane, a sedin in stât di fevelâ ai furlans di ce che a son, di identitât. Isal cussì?

«Glesie Furlane e svole come un spirt, di dirit e di resistence par un mont libar. E je une associazion nassude par reclamâ un dirit sacrisant, di popul, chel di preâ inte proprie lenghe. Glesie Furlane e à scombatût il podê costituît par scuasit mieç secul e e continue a fâlu, cirint di stâ cu la int e di fevelâ cu la int, jessint un esempli di impegn e di passion, no dome pai furlans». ❚

servizis di Erika Adami

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +