La musiche e jentre dentri des latariis par celebrâ il mont des piçulis produzions caseariis, che ancjemò in dì di vuê al reste vîf. O fevelìn dal “Blanc european festival, l’art intes latariis”, une manifestazion promovude de associazion “Coro Santa Maria Lestans” che si è davuelte pe prime volte jenfri Avost e Setembar in gracie de poie de Fondazione Friuli e de colaborazion di une schirie di Comuns furlans.
Jenfri lis latariis dulà che si à sunât a son chês di Dieç di Tumieç, la ex latarie di Cabie a Darte, la ex latarie di Madone da Çuc a Cjastelgnûf, chê di Maranzanis a Povolâr di Comelians, e ancje chê di Ravasclêt.
«La volontât – al spieghe Riccardo Pes, diretôr artistic de manifestazion – e jere chê di ripuartâ la atenzion viers un lûc che, se di une bande al fâs part dal passât, al è vîf ancje vuê. Tantis personis, ancje int che e à studiât, e je tornade a chescj lavôrs. A son realtâts piçulis che a produsin inmò in dì di vuê cualitât alte».
Tra i artiscj che a àn partecipât puartant la lôr musiche tes latariis, al è il compositôr Karim Younis, il tercet di Londre cun Valeria Pozzo, Joseph Costi, e Yusuf Ahmed, la orchestre di zovins di Belum, ma no si à dome sunât, par vie che la musiche si è unide a altris arts, si che duncje si à vude ancje la partecipazion dal coletîf di danze contemporanie EnidUDanza, la fotografe Ulderica Da Pozzo, il scritôr Stefano Montello, e la atore Giulia Pes.
«La esperience – al conte ancjemò Riccardo Pes, ancje lui tra i partecipants, viodût che al sune il violoncel – e je stade positive: o vin vût une biele partecipazion di public. Là che si podeve, o vin sunât dentri des struturis. In altris câs, di fûr. Bisugne dî che no son stâts problemis di acustiche, anzit, dut si à sintût ben. Par chel che al inten l’ambient, o crôt che al sedi il rûl dal artist chel di trasformâlu in alc altri: a son stâts câs dulà che ancje une cjalderie che e podeve someâ fastidiose, e je deventade part de coreografie dal spetacul. O soi stât content ancje di vê puartât artiscj di difûr a scuvierzi chestis bielis realtâts, inmò une vore impuartantis. La rispueste e je stade buine ancje in tiermins di contats: di fat o vin za regjistrât tancj Comuns che nus domandin di vignî alì di lôr, e o pensìn di tornâ a proponi la manifestazion l’an che al ven ancje ta chescj teritoris, cun chê di slargjâ il program. Il “Blanc european festival” nol à l’obietîf di ricuardâ un mont pastorâl, ma chel di vivi la bielece di chestis realtâts che a son inmò presintis». ❚
Piero Cargnelutti