Di Biasiol ae Pavatti. Ufici scolastic regjonâl svuedât

Dal prin di Març dal 2017, di cuant che Pietro Biasiol al è lât in pension, la vuide dal Ufici scolastic regjonâl e je za passade dôs voltis di man. Alida Misso, che lu veve sostituît, si è dimetude za tal Autun dal stes an e ancje Igor Giacomini, zovin avocat che prin al veve vude la competence su la part des scuelis de minorance slovene, al è durât un an par po molâ çus e vergons. Il lôr rûl al veve di jessi il plui bramât de scuele furlane, invezit ducj i doi a àn scuviert che par stâ sentâts su chê cjadree e covente une vocazion al martueri. E cussì, a àn sielzût di dismontâ jù di une barcje che intai agns si è disvuedade simpri di plui; in cinc agns, a front di desenis di pensionaments, no je stade nissune sostituzion: al è stât bandît dome un piçul concors par cinc puescj di funzionari aministratîf. I uficis periferics a son colassâts: “nol è plui nissun”, e je la descrizion sintetiche dade dai sindacâts, “ca di pôc o fevelarìn cui termosifons”. In plante organiche aromai al mancje un dipendent su doi. E no son “in marine”… ❚ (W.T.)