Il decim tierç esecutîf sloven, il prin di minorance, al à passât inte seconde metât dal Dicembar stât i siei prins 100 dîs, che al è calcolât il moment classic par segnâ un prin belanç dal lavôr fat. Tra i sucès principâi de sô scuadre, il prin ministri Marjan Šarec al segne lis tratativis cui sindicâts dal setôr public, che cun chei si è rivâts a un acuardi sodisfasint par ducj: cui che al lavore intal implei public al gjoldarà di cundizions contratuâls miôr, ma il belanç dal Stât nol vignarà metût a pericul.
Il guvier al è rivât ancje al acuardi cui Comuns slovens sui contribûts pro capite che il Stât al assegne aes aministrazions locâls: a varan 573,50 euros par abitant, il contribût plui alt di simpri. Tra lis misuris principâls e jentre ancje la gnove leç sul salari minim legâl, proponude de çampe e poiade de coalizion di guvier. Di là dai auments pal 2019 e 2020, e de esclusion dal 2020 indenant di dutis lis indenitâts e zontis dal calcul dal impuart, la leç e fisse che dal 2021 il salari minim al varà di passâ almancul dal 20% – ma no plui dal 40% – il valôr de spese minime mensîl par une cualitât di vite acetabile in maniere minime.
Tra i intervents indicâts intal rapuart dal guvier sui prins 100 dîs ancje la eliminazion des ultimis misuris di sparagn in materie di prestazions sociâls e il mantigniment dai impuarts dai assegns sociâi, che a son stâts cressûts di resint. Il guvier al à ancje za prontât un plan di intervents di politiche ative dal lavôr.
Tra lis prioritâts pal futûr a vegnin indicadis lis modificazions fiscâls par slizerî il cost dal lavôr, misuris che a garantissin l’ecuilibri tra economie e sociâl, altris risorsis ae sanitât par risolvi il probleme des listis di spiete, e intervents par risolvi cualchi cuistion ambientâl urgjente.
Si à di zontâ che il guvier di centriçampe formât di LMŠ (la liste dal prin ministri), Socialdemocratics (SD), Partît dal centri moderni (SMC), Partît di Alenka Bratušek (SAB) e Pensionâts (DeSUS), fin dai prins dîs e des nominis dai segretaris di stât nol è stât franc di polemichis, e Šarec al à scugnût za sostituî ancje il ministri Marko Bandelli (SAB), costret aes dimissions, e che al à cjapât il so puest ae vuide dal dicasteri pal disvilup e coesion Iztok Puricˇ. In ogni câs, al somee però convinci simpri di plui la opinion publiche. Intal scandai politic mensîl fat in Dicembar dal istitût Mediana pal cuotidian Delo, l’esecutîf al è rivât di fat al vôt medi di 3,09 (su 5), il massim otignût fin cumò. Cun di plui, dome cirche un cuart dai intervistâts al à judicât ce che al à fat il guvier in mût negatîf (15,5%) o une vore negatîf (8,2%). Al moment dal insediament, la scuadre di guvier e jere partide cul vôt di 2,16. ❚
Tjaša Gruden
