LA GNOVE. 20.000 iscrits ae pagjine “Facebook” de Patrie

Facebook tai ultins timps lu piturin in crisi, ancje se al reste il social network plui doprât. Il scandul Cambridge Analytica, la jessude dai zovins, lis fake news, i account fals e lis gnovis regulis su la privacy lu fasin someâ cul flât a grops. Ma al reste simpri une biele vetrine, li che nol è facil fâsi viodi. Par chest il risultât che o vin rivât a vê al è impuartanton: a son in 20.000 chei che a àn metût il like (ven a stâi «mi plâs») su la pagjine Facebook de nestre riviste. Il numar al è ancjemò plui impuartant se si calcole che i contignûts a son ducj par furlan.
Un grant contribût, duncje, a cirî di “alenâ” i furlans a lei te lôr marilenghe, che si sa che no je une robe ni facil, ni scontade, par vie che une scuele che e insegni la nestre lenghe le spietìn di agnorums e e à ancjemò di rivâ. Lis 20.000 adesions nus metin ancje fra i prins fra i mieçs di comunicazion regjonâi presints su Facebook. Nô o doprìn chest imprest par difondi la nestre riviste e par vê un rapuart plui diret cui nestris letôrs.
Ma cui sono chei che nus seguissin su chest social? Lin a viodi cualchi cifre a proposit dai iscrits ae pagjine. O vin fat il confront di cuant che o jerin a 5.000 iscrits, tal 2015. La percentuâl di feminis e oms e je in pratiche compagne: 51% cuintri 49%. A pet dal totâl des personis su Facebook, però, (54% oms, 46% feminis) o vin plui sioris, e nus fâs un grum di plasê.
La etât plui rapresentade e je chê dai 45 ai 54 agns (11% dal totâl), un tic plui vecje dal 2015, subit dopo chei di 34-44 e di 25-34 cul 10% parom.
L’84% al ven de Italie, ma o vin ancje tancj letôrs di difûr dai confins statâi. Cui vegnial dopo de Italie? Si conferme prime la Argjentine (3% dai iscrits), un lûc li che a son lâts in tancj furlans, pôc dopo la France, un tic stacâts Stâts Unîts, Canadà e Australie che a àn superade la Svuizare, che une volte e jere tierce jê. Pôc dopo, ancje la Belgjiche che une volte e jere plui indevant in classifiche.
Fevelant de divignince, par chel che al inten lis citâts, Udin al è prin di un biel toc: il 10%. Si conferme secont Milan (2,5%). In tierce posizion al ven sù Triest (1,6%) al puest di Rome. Dôs citâts forestis, si podarès dî par fâ une batude. Tiercis a pari merit Rome e Pordenon, e dopo Gurize, Codroip, Glemone, Tumieç (0,9%)…
Par finî, un salût a chei che nus seguissin de Indie. A son 7: mandi! ❚
Dree Venier