Cincuante concierts in mont cun Carniarmonie

Il festival al segne la vite culturâl estive in Cjargne cuntune schirie di propuestis che a cjapin dentri ancje visitis aes mostris e cjaminadis naturalistichis
A l è il festival de mont furlane plui preseât, cui siei vincjesiet agns di ativitât che a àn segnât e che a segnin ancjemò, la vite culturâl estive in Cjargne. No dome concierts, ma dut un insiemi di ativitâts e di propuestis che a passin des visitis aes mostris aes cjaminadis naturalistichis, in sinergjie cui Comuns des valadis cjargnelis, produtôrs locâi e associazions culturâls. Il festival si clame Carniarmonie e al è cognossût ancje tal forest, in virtût di un public stranîr – soredut de Austrie, Slovenie, cuntun bon numar di vacancîrs che a tornin di Istât de France e de Belgjiche –, che al sta daûr cun passion e atenzion a cheste rassegne, tacade ai 14 di Lui e che e larà indevant fin ai 14 di Setembar. La direzion artistiche e je dal clarinetist Claudio Mansutti, diretôr de Fondazion Luigi Bon di Colugne che e organize il festival, un musicist e manager che al à savût tai agns slargjâ il rai des propuestis musicâls e tirâ dentri di volte in volte simpri plui Comuns e lûcs, dispès pôc cognossûts ancje dai cjargnei, par une grande manifestazion di culture che no si dismentee de identitât, de tradizion furlane.
Chest an si contin trentecinc concierts, plui dîs apontaments corâi, cun degustazions di deliziis de cusine locâl, tal ambit de “La lungje gnot des Plêfs in Cjargne”, partner di Carniarmonie, altris concierts in colaborazion cu la mostre “I ragazzi del ’99 e…” tal mês di Avost a Ravasclêt, e infin la novitât “Dopo Messe”: trê concierts organistics a Damâr, Soclêf e Tumieç, dopo des funzions sacris. In dut a son cincuante apontaments musicâi, in dome doi mês.
Altre grande novitât e je la nassite de Zovine Orchestre Alpine, une formazion sinfoniche di cuarante musiciscj dai 18 ai 25 agns, fondade cu la vitorie dal bant culturâl dedicât ae nomine di Tumieç a Citât Alpine. Cussì il festival si fâs orchestre, dulà che intes filis no mancjin musiciscj furlans. Une grande ocasion par cressi intun ambit professionâl, direzûts di volte in volte di un diretôr di orchestre diviers e di nomee internazionâl. A son stâts lôr a vierzi la rassegne, ai 14 di Lui, inte Abazie di Mueç, insiemi cun altris musiciscj furlans: il pianist Matteo Andri e la violiniste Laura Bortolotto, sot de direzion dal bulgar Grigor Palikarov. A tornaran domenie ai 29 di Lui inte Plêf di Pontebe, direzûts dal grant Alfonso Scarano.
I lûcs privilegjâts a son lis glesiis antighis, lis plêfs, i museus, lis salis polifunzionâls, teatris e auditoriums, i lûcs de culture in Cjargne che a cjatin in Carniarmonie un disveâsi significatîf e une afluence di public straordenarie, tant che la plui part dai apontaments a regjistrin il dut esaurît.
Altre grande novitât e je che e torne la Opare in Cjargne, che e mancjave di un pieç. Miercus ai 8 di Avost, tal Auditorium Candoni di Tumieç al larà in sene il Nabucco di Giuseppe Verdi. Al è l’unic conciert a paiament, a presi cetant bas, insiemi ae iniziative dai 8 di Setembar al Museo Gortani, cul conciert di Alberto Busettini – in trê fassis orariis tal dopomisdì – al preziôs clavicembal dal Sietcent che al jere di proprietât de famee Linussio; po dopo, e sarà une visite vuidade al Museu daûr di un percors pensât di pueste. Ducj chei altris a son a gratis e la ufierte e je cetant alte, cun orchestris, ensembles, soliscj, cuntune ventine di gjenars musicâi: classiche, jazz, etniche, contemporanie e contaminazions.
Tancj i artiscj di dut il mont, cence dismenteâ i nestris furlans che cussì si fasin agradî no dome tal forest, ma ancje a cjase. Tra chei, la Blue Mystic Band cuntun progjet ideât dal musicolic e musicist Marco Maria Tosolini (ai 4 di Avost a For di Avoltri), il Côr dal Friûl Vignesie Julie direzût di Cristiano Dell’Oste insiemi dal ensemble La Chimera cu la Misa Criolla (ai 12 di Avost a Soclêf), il duo Alex Sebastianutto e Sebastiano Mesaglio (ai 14 di Avost a Voltoiis di Dimpeç), Elsa Martin cun Alessandro Turchet e Andrea Ruggeri intun conciert-dediche a Pierluigi Cappello (ai 18 di Avost a Mueç), il duo Sara Papinutto e Carolina Pérez Tedesco (ai 24 di Avost a Cjavaç). Dut il larc program e ogni detai de rassegne si cjatin tal sît www.carniarmonie.it ❚
Alessio Screm