SLOVENIE. Al vôt cuntune setemane di anticip

Si fasaran ai 3 di Jugn lis prossim elezions politichis slovenis. Si trate, di un pont di viste tecnic, di elezions anticipadis, ancje se in realtât dome di une setemane. La legjislature e jere aromai prossime al tiermin naturâl e e jere calcolade za cuasi cierte la date dai 10 di Jugn pe gnove consultazion eletorâl, ma a cambiâ lis cjartis in taule al è stât il prin ministri Miro Cerar che si è dimetût ai 14 di Març. Propit un mês dopo, ai 14 di Avrîl, il president Borut Pahor al à disfat il Parlament, inviant cussì di fat la procedure eletorâl. Pahor al à formalizade la sierade anticipade de legjislature dopo des consultazions cui cjâfs grup parlamentârs e cui rapresentants des comunitâts minoritariis nazionâls taliane e ongjarese in Parlament, e dopo che a son scjadûts ducj i tiermins par podê proponi un gnûf prin ministri. Daûr de leç slovene, in câs di dimissions dal president dal consei, la pussibilitât di indicâ un gnûf candidât i tocje prime al president de Republiche e po dopo ai grups parlamentârs.
Lis dimissions di Cerar – il tierç prin ministri sloven inte storie a dimetisi dopo Drnovšek e Bratušek – a son rivadis dopo de decision de Cort Massime di anulâ il referendum sul secont binari Divača-Cjaudistrie che il guvier al veve sostignût, stimantlu un progjet strategjic pal puart di Cjaudistrie e pe Slovenie in gjenerâl. L’esecutîf al veve ancje partecipât in maniere ative ae campagne referendarie, e al è propit chest rûl che la Cort Massime e à criticât – il guvier, che al veve finanziât la proprie campagne cun bêçs publics, al varès informât i citadins in mût unilaterâl, presentant dome i aspiets positîfs dal progjet – e che duncje al à puartât i judiçs a anulâ la consultazion, là che al jere in ogni câs prevalût il “sì”. Il referendum al è stât ripetût domenie ai 13 di Mai, nuie election day.
di Tjaša Gruden