COMUN DI UDIN. Vincenzo Martines

Centriçampe
«Citât di progjets che a puartin risorsis de Europe»
Vincenzo Martines, 54 agns, nassût a Triest e dai 7 agns a Udin. Par 8 agns al à zuiât di balon tai zovins de Udinese. Si è indotorât in Economie, al à scomençât a lavorâ tal privât. Tal 1991 si è iscrit al Pds, po Ds e Pd. Al è stât vicesindic di Udin cun Sergio Cecotti e Furio Honsell e dal 2013 al è conseîr regjonâl. Candidât di Sinistra Aperta, Siamo Udine, Innovare, Partito democratico.
Udin tant che “capitâl dal Friûl”. Il dibatiment, su chest teme, al è ferbint. Ce pensial? Cuâl rûl pensial che e vedi di vê la citât?
«Bielzà tal 1947 Pasolini al diseve che bisugne trasformâ la preistorie in storie e la nature in cussience. No crôt in Udin capitâl dal Friûl tant che “caput mundi”, par vie che al volarès dî considerâ la citât un scjalin plui insù dal rest dal teritori. In dì di vuê a son tantis lis citadinis furlanis che a rapresentin il spirt e la culture furlanis».
In ce relazion aie di metisi cul teritori?
«Udin e je une citât che te sô anime, te sô storie e te sô cuotidianitât e rapresente dutis lis animis dal Friûl. Inalore in chest sens o crôt che e puedi vê un rûl ancje di riferiment. Pensâle tant che “caput mundi” in rapuart al rest dal teritori, invezit, e je une concezion vecje. Cjalantle sul presint e par cemût che o viôt il so avignî, Udin e je di par se il Friûl»
Cuâl pês aie di zuiâ in Regjon?
«Udin e à di jessi citât di progjets che a puartin risorsis de Europe. No pues, duncje, no pensâju se no slargjâts a cjapâ dentri il teritori dal dulintor, dutun cu la Universitât e fuarcis privadis. Cussì o rivarìn a jessi un teritori competitîf e a vê un rûl politic e economic te suaze regjonâl. Al Comun i spiete l’impegn di savê meti adun lis miôr energjiis par jessi prins in Friûl-Vignesie Julie».
Ce pensial di fâ pe lenghe e pe culture furlanis?
«La culture in gjenerâl e je un aspiet che al diferenzie Udin. La lenghe furlane nus permet di contâ cui che o sin pardabon. Si pues daurman meti in pins, par esempli, une Stagjon di teatri e culture furlanis, cu lis fuarcis unidis di Css, Nico Pepe, dal Teatron. Si capìs che e covente la volontât di ducj».
Su cuâi fronts pensial di intervignî in maniere prioritarie in câs di elezion?«Guviernâ cui citadins: decentrament e partecipazion; prevenzion e sigurece; sanitât e intervents cuintri la puaretât».
di Antonella Lanfrit