«Al varès vût ancjemò pagjinis straordenariis di scrivi par contâ il Friûl che fin cumò nissun al è stât bon di contâ. E par chest al è un pecjât dopli che al sedi mancjât»: peraule di Flavio Santi, scritôr ma ancje docent universitari e critic, che al à mot i prins pas di poete in chê farie di talents che e fo La barca di Babele, golaine poetiche origjinâl direte di Pierluigi adun cun Ivan Crico pal Circul Menocchio di Montreâl.

Propit Crico si vise di chê esperience: «Pierluigi al è stât par ducj nô un cataclisme pacjific, che nus à judât a esplorâ une dimension no cognossude. O scrivevin par talian, furlan, bisiac, triestin: e chê e fo une des realtâts plui significativis pe culture regjonâl di in chê volte». Baste cjalâ i nons di chei che a àn scrit par cheste golaine: Alberto Garlini, Vincenzo Della Mea, Mario Benedetti, Gian Mario Villalta, Novella Cantarutti, Nelvia Di Monte, Umberto Valentinis, Giacomo Vit e po Ida Vallerugo e Flavio Santi. Che al fevele di Cappello come dal “Usain Bolt de nestre leterature”, e no dome pes poesiis ma ancje pes pagjinis di prose: «Cemût che al conte lui, il taramot in Questa libertà no lu à mai contât nissun. Une straordenarie dimostrazion che Pierluigi intai agns a vignî al sarès stât bon di regalânus di sigûr il grant romanç che al Friûl i mancje».

Al cres ancjemò di plui il corot di chei che lu àn cognossût e a àn viodût trop che - ancje cun dutis lis dificoltâts che l’incident i veve lassât - la sô poesie e je stade buine di dismovi intai letôrs e intai siei coleghis.

Il bisiac Ivan Crico, par esempli, al conte che «A Pierluigi la vite i veve gjavât dut, ma no la vôs par cjantâle. Cence mai cedi aes lamentazions. Anzit, cirint di cjalâ cui voi di un frutin la essence plui fonde dal misteri de vite, cun tante voie di maraveâsi dai siei miracui e tradusiju in peraulis e sunôrs bogns di deventâ musiche». Musiche come la version di Inniò che Alice e à fat juste in timp a puartâ ai Colonos chest Istât: e no varès mai pensât che chel stes toc al sarès coventât juste doi mês dopo pal so funerâl.

✒ Walter Tomada