SLOVENIE. Borut Pahor a Sant Pieri dai Sclavons, la prime volte di un president sloven in Benčija

«O sin chi slovens e europeans, talians e europeans, furlans e europeans. Ognidun al fevele la sô lenghe, la sô marilenghe, al è de sô nazion, de sô culture, ma al aparten ancje a une patrie plui grande, chê europeane, che no dome al sopuarte cheste diversitât, ma le promôf.» Il president de Republiche di Slovenie Borut Pahor al à scomençât cussì il so intervent ae cerimonie che cun chê ai 11 di Març e je stade screade uficialmentri la rinovade sede de scuele bilengâl di Sant Pieri dai Sclavons, une scuele là che i fruts «si usin a une vite là che al covente rispietâ lis diferencis e tal stes timp restâ fedêls aes propriis tradizions».
Pahor al à volût duncje sotlineâ la ricjece culturâl di chest teritori e la impuartance de lenghe, definide «la ancure di ogni popul». «Cui che si cjate vuê chi, talians, slovens, furlans, al è convinçût che la multicularitât, il rispiet di dutis lis identitâts, soredut chês linguistichis, sedi un alc che al garantìs ai fruts un futûr di pâs e serenitât.»La visite dal president de Republiche di Slovenie Borut Pahor e je stade ancje la prime indreçade di un president sloven in Benčija, e une ocasion ancje par frontâ il teme de colaborazion economiche e culturâl trasfrontaliera.Il vicepresident de Regjon Friûl-Vignesie Julie Sergio Bolzonello, al à sotlineât il rûl dal ent inte valorizazion des comunitâts linguistichis regjonâls e inte armonizazion de diversitât linguistiche, e al à marcât il stât ecelent dai rapuarts bilaterâi tra Slovenie e Italie.In chest contest la Regjon Friûl-Vignesie Julie e je in prime file, braurose des relazions diretis e puartadis indevant cu la Slovenie, inte ricercje dai vantaçs che a derivin di une cooperazion europeane infuartide a nivel di macroaree, inte Regjon Alpine e inte Regjon Adriatico-Ioniche.I temis di interès comun a rivuardin massime la mobilitât trasfrontaliere su ferovie, il sociâl, la istruzion e la difese dal ambient, al à ricuardât Bolzonello.
Il gnûf program Interreg V-A Italia-Slovenia pal periodi 2014-2020 al à a disposizion plui di 90 milions di euros. Par ce che al tocje i progjets standard a son stadis presentadis 160 propuestis progjetuâls che a son ancjemò in spiete di valutazion. Inte programazion di prime (2007-2013) a son stâts finanziâts 87 progjets intai setôrs de competitivitât, ricercje e inovazion, tutele e valorizazion des risorsis culturâls e naturâls e servizis transfrontalîrs. Tra chescj, par esempli, ancje il progjet Jezik_Lenghe che e à metût dongje, tra chei altris la comunitât slovene in Italie e chê taliane in Slovenie ma ancje il Consorzi Universitari Dal Friûl e il Centri Internazionâl sul Plurilinguisim de Universitât di Udin. Intal ambit dal progjet al è stât fat ancje il museu multimediâl SMO (Slovensko multimedialno okno – Finestra multimediale slovena) di Sant Pieri che il president sloven Pahor al à visitât al tiermin de cerimonie. ❚
✒ Tjaša Gruden