.

✽✽ O crôt che al sedi just fâ un belanç des manifestazions che a son stadis fatis in dut il Friûl pe fieste dai 3 di Avrîl. Un belanç che al pues dome che jessi positîf, viodudis lis tantis iniziativis che lu àn caraterizât.

✽✽ Prin di dut graciis di Sapade che e à acetât i partecipants cun grant afiet e simpatie. O ribat che la bataie pal so tornâ al Friûl e rapresente un moment fondamentâl pal nestri riscat democratic, dopo decenis di gjestion intolerabile dal podê de bande dai partîts talians. Ma o vuei sotlineâ – di là di chês che a àn vût adesion plui penze e di chês che a àn regjistrât minôr partecipazion di public – il numar di conferencis, incuintris, dibatiments organizât de Assemblee de comunitât linguistiche furlane.

✽✽ A àn dimostrât la sensibilitât cressinte dai sindics, des aministrazions, a fâ dai 3 di Avrîl une vere fieste nazionâl, un ricognossiment istituzionâl che dal sigûr di bessôl nol baste, ma che al vierç un varc impuartant intal aparât statâl, che si è mostrât fin vuê difensôr convint di un ordin regjonâl, copie cjarbon di chel centrâl.

✽✽ Se duncje il risultât istituzionâl al è stât bon, dal an prossim o vin di spietâsi e domandâ alc di plui. No
si trate di abandonâ il rûl dai Comuns, ma anzit di rinfuarçâlu sul plan de partecipazion popolâr. Dongje dai moments di memoreament, dal lôr just rapuartâsi aes tematichis e ai problemis contemporanis, al va cjatât il spazi e i mûts par che il ricuart di chê date al deventi moment di vere fieste popolâr, cun dut chel contor di elements che le fasin cussì, dai bancuts ai barachins, dai bai ai cjants. La cussience di celebrâ la nestre fieste, chê dal popul furlan, e à di deventâ ocasion di gjonde, di une voie ricjatade di stâ insiemi.

✽✽ Une vision duncje coletive che nus permeti ancje di bati chê brute e vecje abitudin di tancj “furlaniscj” sierâts inte logjiche dal propri gruput o intal pretindi arogant di jessi i unics cu la veretât te sachete.

✽✽ Un fenomen che si mostre inte sô gramece infinide su Facebook che, di strument potent di comunicazion, di propagande, si viôt dispès ridusût al scambi di acusis salvadiis e mutuâls, ae autocelebrazion dal propri jo, al sbroc di chês che a somein plui ossessions personâls che no resonaments politics.

✽✽ In viste des prossimis elezions, stait sigûrs, lis ocasions si moltiplicaran, creant chel clime di inciertece, di disilusion permanente, di malfidence intal rivâ a fâje. A fâ ce? A meti fin al predomini de partitocrazie taliane, a fermâ la ruvine dal Friûl. Cemût? Vincint lis regjonâls, cuntune grande e uniche liste autonomiste.

✽✽ Fantasie? Cun ce crodêso che si cambii il mont, se no cul sium di alc. ❚

✒ Dree Valcic