_Mandi nono!
Mandi, frute! Ce âstu li?
_O ai comprât un zûc pal piçul.
Brave frute! Fâlu zuiâ tant, il gno nevodut. Ce i âstu cjolt?
_Une cusinute. I plâs tant viodimi a fâ di mangjâ.
Une cusinute? Nol è mighe une femine! Parcè no i âstu cjolt il bancut di mecanic?
_Su po, nono, no esistin zûcs di mascjo e zûcs di femine! I fruts e an di zuiâ cun ce che àn voie. No stâ jessi cussì anti-gender.
Anti-ce?
_Anti-gender. Cuintri da la teorie dal gender.
La teorie ce?
_La teorie dal gjenar.
Ce gjenar di teorie?
_Dal gjenar.
Si, ma ce gjenar?
_Propite dal gjenar, tal sens di mascjo o femine. I studiis di gjenar e disin che un cont al è il ses biologjic, un cont chel culturâl e sociâl. Insome: jo i pues jessi une femine ma sintîmi un om.
Ah, ben, chês robis li e son simpri stadis, dome che une volte se a un om i plaseve un altri om, lu faseve di scuindon.
_No: cui che ti plâs e je un’altre robe ancjemò. Une robe al è il ses, une robe il gjenar, un’altre robe i tiei guscj. Tu podis jessi un mascjo e sintîti une femine, ma ti plasin lis feminis.
Spiete, spiete, fermiti, che cumò scomenci a no capî plui nuie. E ce centrino i zûcs di gno nevôt?
_Che no si à di sielzi par lôr a ce fâju zuiâ. Se al à voie di zuiâ cun la cusinute al pues zuiâ, ancje se al somee un “zûc di feminis”. E son dome i “anti-gender” che a alcin dut un polvar parcè che e disin che cussì o confondìn i fruts che dopo non san plui ce che e son.
Duncje no esistin robis di feminis e robis di mascjo?
_Propite cussì, nono!
Nancje gucjâ e il salam cun l’asêt?
_Nancje chei. O sai che e je une robe dificile di capî par un de to etât, ma…
No, no, frute. O sarai ancje vecjo, ma nd’ai viodudis di robis. Vuê e saran ancje i oms cun la cotule a fâ sfiladis di mode, ma lis feminis cun lis mostacjis come che lis ài viodudis jo, cumò no tu li cjatis plui di nissune bande! ❚

✒ Bete Di Spere