Assemblee de Comunitât linguistiche a un an de scree: il lavôr al va indevant

Al veve domandât la personalitât juridiche pe Assemblee de comunitât linguistiche furlane, ma tal Consei regjonâl dai 23 di Jugn la maiorance e à dit di no, ancje se de bande de Zonte e jere disponibilitât. Dut câs, il president nol mole: «O tornarìn a sburtâ su chest cantin, par rinfuarcî la vôs di chest ent», che si sta ingrandint simpri di plui.
Cussì Diego Navarria, sindic di cjarlins e president de Assemblee, al inzorne su la vite de stesse Assemblee a un an de sô scree – dopo jessi stade proviodude de leç 26 dal 2014 – fate cu la riunion di Lui dal 2015, simbolichementri tal Parlament dal cjistiel di Udin, dulà che si son dâts dongje ducj i Comuns che fintremai alì a vevin aderît, tant a dî 55. Vuê il numar al è rivât a passe 90, «no cate che al sedi par nuie sempliç il troi pe adesion». Tocje che il sindic si cjapi sù l’impegn – «e in chescj timps i pinsîrs dai sindics a son tancj» -, che al puarti l’argoment in Consei comunâl e che chest al aprovi la adesion.
Dut câs, il procès al va indevant. «O varessin di rivâ sigûr parsore i cent, ator dai 110 – al considere il president -, inalore o podarìn dî di rapresentâ plui de metât dai Comuns furlans de regjon, e vê duncje une rapresentativitât impuartante ».
Intant te sentade dal Consei regjonâl dai 23 di Jugn al è stât dât un altri vie libare a un reclam de Assemblee, tant a dî vê la poie di cualchi ufici regjonâl pe segretarie, stant che cumò dut al cole su la buine volontât e sul volontariât dai sindics. «Un segnâl positîf», al marche Navarria, pensant che lis resintis elezions aministrativis a puartaran a cualchi cambiament. No dome par vie che altris Comuns a podaran unîsi, ma ancje parcè che al cambiarà un dai 5 components dal diretîf, stant che il sindic di Comelians al è cambiât. In plui di Navarria, chei altris a son i sindics di Vît, Voleson e Dolegne.
Un altri dai cantins vierts e che la assemblee e à voie di sclarî a son, tal concret, i argoments dulà che e pues votâ tal Consei des autonomiis. «La leç e dîs sui argoments che a integnin la comunitât linguistiche furlane. Ma al è gjeneric, e il parê che o ai domandât ai uficis al è ancjemò plui gjeneric. Duncje, chest an no ai mai podût esprimi un vôt. Si trate par esempli – al siere -, se l’eletrodot al è une robe che e inten la comunitât linguistiche furlane o no». La Assemblee si è fate sintî ancje in cont dal Italicum, de riforme de Rai, de leç su la editorie pes minorancis, e e partecipe ai dibatiments in cont de autonomie regjonâl. In Autun la prossime assemblee. ❚
✒ Antonella Lanfrit