Auguris a Federico Rossi pal Mittelfest

O cognòs Fidrì dai Ros di agnorums e mi fidi di lui, no dome pes robis che al à puartât indenant fintremai des primis trasmission in radio cun chel “Friûl ch’al vîf” che al à segnât la bataie de Icfi e no dome, par continuâ cu la sô presince in consei regjonâl, a Onde Furlane, cumò a Radio Spazio 103, e po dopo in chê esperience uniche che a son i Colonos. Al sarès avonde, ma si scuen zontâ ancje un alc che par nô al vâl une vore: al è stât ancje diretôr di chest gjornâl.
Cumò al è stât nomenât president dal Mittelfest. I auguris miei e di dute la Patrie di bon lavôr.
Un incaric di lustri, ancje dificoltôs e plen di vuatis. La prime e rive di bande furlane: secont me, cualchidun al à bielzà prontade la sclope su trop furlane che e sarà la edizion dal Mittelfest cu la sô direzion. La seconde e rive di chê altre bande, clamìnle regjonaliste, par no dî triestine, che di sigûr e viodarà la acuile sot di ogni event. Po dopo une tierce, plui pericolose di dutis, di chei che si definissin siei amîs e che lu sburtaran sul troi des sieltis “no provinciâls”. Chei, par capîsi, che a disin: “Che bello il friulano, bravo Federico, ma mi raccomando, al Mittelfest usiamo l’inglese e l’italiano”.
Fidrì, o crôt che al sedi avonde vacinât par dutis chestis cuistions e duncje il Mittelfest al pues jessi une biele ocasion pe culture di cheste Regjon.
O scrîf Regjon e no Friûl, parcè che lis dôs dongje no stan, ma a puedin jessi rapresentadis te manifestazion di Cividât.
Almancul vê dirits compagns: cuant che al è nassût Mittelfest, e jere la vetrine europeane di un teritori ancjemò segnât de idee di Alpe Adria, dulà che la colaborazion cun Slovenie e Carinzie e jere la fonde de nestre politiche foreste. Si slargjave a est cul ricuardi dal imperi austroongjarês, e prime ancjemò dal Patriarcjât. La gjestion artistiche di Pressburger e de Gallina, triestins ducj i doi, e cjalave ai grups teatrâi di chei paîs, ancje pai contats che a vevin lôr cun chei grups. Alc di furlan si è viodût. Mi visi dal “Arc di sant Marc”, no a câs nassût ai Colonos, “Bigatis” dal libri di Elio Bartolini. No stin chi a fâ la storie: in sumis, pôc. Soredut, cuasi une operazion di muse, plui che di sostance. No je mai vignude fûr la impuartance e il parcè che il Friûl al jere il lûc miôr par fâ incuintrà lis nazions e lis culturis dal centri european. In sumis, ancje chi: parcè la storie puartie a sielzi il Friûl?
Chest mi somee che al sedi il travuart di Rossi, dongje naturalmentri di une presince di produzions furlanis di cualitât.
Se il public, i artiscj, i gjornaliscj e ducj chei che a passaran par Cividât pal Mittelfest si inacuarzaran di jessi pardabon rivâts intune tiere divierse par lenghe, storie e culture, il lavôr di Fidrì al sarà stât un bon lavôr. Auguris. ❚
✒ Dree Valcic