E DUCJ A VIVERIN… FURLANS E CONTENTS. Il brut masurin

E jere une volte, vie pe Basse, une famee di masurins che e viveve dongje de lagune di Maran.
Mame masurine e veve fat i ûfs e e stave clucint intant che il pari masurin al slargjave il nît (al jere un masurin furlan: la cjase prime di dut!).
Une dì, i ûfs si vierzin e a saltin fûr cuatri biei poleçuts, ducj compagns. Mame masurine e jere contente, parcè che a someavin bogns e plens di voie di fâ ben.
Ma un dai ûfs no si jere ancjemò viert. Al jere un ûf plui grant di chei altris. Mame masurine e lave indevant a clucî ma e jere un pôc sustade, par vie che e jere une masurine furlane, e no veve masse timp di pierdi. E ancje il pari al jere malcontent, parcè che fin che ducj i poleçuts no jerin nassûts, nol podeve paiâ di bevi ai amîs masurins.
Cuant che in fin l’ultin ûf si vierç, al jes fûr un poleçut dut diferent di chei altris.
“Nol sarà migo un poleçut triestin?”, al domande il pari masurin.
“No crôt”, e rispuint la mame masurine. “Al è lât subit cui siei fradis a cjapâ sù semencis di mangjâ, no si è poiât jù a cjapâ soreli”.
Ma ancje se al jere un brâf poleçut furlan, i fradis no lu acetavin, parcè che al jere diferent di lôr, cussì il brut masurin al scomence a lâ ator par dut il Friûl cirint altris masurins compagns di lui, di cressi cun lôr.
Al va viers soreli jevât fin tes rivis dal Lusinç ma al torne indaûr parcè che – va ben jessi bruts – ma lâ ancje a vivi in Bisiacarie al è masse.
E alore al rive sù tal parc dal Cormôr ma i uciei udinês no àn voie di messedâsi cuntun poleçut di campagne, cun di plui de Basse.
Al prove a lâ ancjemò plui sù fin tal lât di Fusine ma al è masse frêt par un poleçut usât te lagune.
Al va ator, e ator, e ator, e ae fin al è passât tant di chel timp che il poleçut al è deventât grant. E cuant che al rive a Morsan, si presente: “O soi un masurin brut, ma plen di voie di lavorâ. Volêso vêmi cun voaltris?”. Alore, un grup di ocjis lu viôt e i rispuint: “Ma tu no tu sês un brut masurin! Tu sês un bielissim ocat! Ven cun noaltris: chi si mangje ben!”.
Cussì il brut masurin, anzit, il biel ocat, al cjate finalmentri un puest dulà stâ ben.
E ducj a viverin furlans e contents, massime chei di Morsan che, cuant che al rivà il moment de sagre, a scuvierzerin che il biel ocat nol jere dome bon di caratar, ma ancje cu la polente. ❚
Lis flabis di Bete di Spere