E DUCJ A VIVERIN… FURLANS E CONTENTS. Hagnul e Gretel

A jerin une volte, simpri vie pe Cjargne, un fradi e une sûr, Hagnul e Gretel, fîs di un puar taielens.
Il puar taielens al jere puar, ma no par mût di dî: al jere cussì puar che une dì, no rivant plui a dâur di mangjâ ai doi fruts, al decît di bandonâju intun bosc.
Cussì il taielens al puarte vie Hagnul e Gretel e, rivât tal puest plui lontan dal bosc, ur dîs: “Spietaitmi chi! O torni subit!”.
Dopo dôs oris, Hagnul e Gretel si stranissin, parcè che il pari – jessint furlan – al jere simpri puntuâl, ma a pensin “Al sarà lât a lavorâ tal ort”. Dopo cuatri oris: “Al varâ vût un lavôr inspietât”. Dopo sîs oris: “Al sarâ lât a bevi un tai dopo il lavôr”. Dopo trê dîs, ancje se un furlan nol pense mai mâl di chei altris, Hagnul e Gretel a scomencin a suspietâ alc, e alore a tachin a lâ ator pal bosc par cirî alc di parâ dentri tal stomi.
Dopo cualchi ore, daûr di un grant cocolâr, a viodin une cjase fate dute di robe di mangjâ: i mûrs a jerin fats di polente, il cuviert di frico, i scûrs di persut di Sant Denêl cui veris di Gote di Cjargne ferbinte (che cun dut chel gas che e à dentri, e stâ sù di bessole), e tal zardin a cressevin plantis di broade e muset. E jere cussì biele che e semeave fente.
“Chê chi e je une americanade! Al semee di jessi a Disneyland”, al dîs Hagnul. “Forsit o sin rivâts a Davian!”
“No”, e rispuint Gretel, “i americans a varessin metût almancul une jeche di patatis fritis! Chê chi e je robe furlane!”
Cussì i doi fradis, che dopo trê dîs a murivin di fam, a scomencin a mangjâ i mûrs di polente. In chel moment, de cjase e jes une vecjute, che ju invide dentri: “Vignît! Us fasarai durmî e mangjâ trop che o volês!”.
Hagnul e Gretel a van dentri e a scomencin a vivi li, cence inacuarzisi di jessi impresonâts, parcè che la vecje e siere simpri ben puartis e scurets cuant che e jes. Une dì, però, Hagnul al viôt une grande pignate e si spavente: “Gretel, la vecjute e je une strie, e sta fasint une pozion!”
Gretel e cerce la mignestre dentri te pignate: “Ancjemò piês, Hagnul, chê chi no je une pozion, e je jote! La vecjute e je une triestine!”.
Alore Gretel al cjape une butilie di Gote di Cjargne, le scjasse, e cu la pression che e ven fûr al rive a butâ jù la puarte e ancje doi trê arbui li devant. Hagnul e Gretel a scjampin, ma prime a matein un pôc tal ort e a rivin a puartâ vie dôs plantis di broade e muset, che a puartin al pari, che cussì nol varà plui il pinsîr di vê fam.
E ducj a viverin furlans e contents. ❚
Lis flabis di Bete di Spere