ZODIAC FURLAN. Zimui

Nassûts jenfri i 21 di Mai e i 21 di Jugn
Segn di Tiere, però un zimul al è di tiere de Grave, un zimul di tiere dai Cuei.
––
Proverbi preferît: “Miôr pan cence nuie che nuie cence pan”, ma ancje “Alc al è alc e nuie al è nuie” (un zimul al preferìs un, un zimul chel altri. Tant a vuelin dî simpri la stesse robe).
Il zimul, jessint zimul, al à dôs personalitâts dentri, une plui furlane di chê altre.
Cussì il zimul, se al è un che i plâs studiâ, al cjape dôs laureis: une in agrarie par fâ miôr l’ort e une in inzegnarie par mateâ.
Il zimul al lavore il dopli di un furlan normâl (che bielzà al lavore il dopli di une cualsisei persone no furlane, fasêt voaltris i conts), cul obietîf, naturalmentri, di comprâ dôs cjasis. Ma chi a scomencin i problemis. Il zimul, di fat, al è dispès in contradizion cun se stes: une personalitât e à miôr comprâ cjase a Lignan, chê altre in Cjargne. La soluzion? Lavorâ ancjemò di plui par comprâlis dutis dôs.
Ma la lote no finìs chi. Al stadi, un zimul al vûl il puest in curve par cjantâ, un al preferìs il puest in tribune par stâ cuviert (cumò provait a induvinâ di ce segn che al è Pozzo, che al à volût cuvierzi sù dut!).
A taule, un zimul al vûl i gnocs di coce e un i cjarsons, un al vûl il muset cu la broade e chel altri il frico. No stait a maraveâsi se dispès i zimui no van propite dacuardi cu la belance.
Cu lis feminis no stin a fevelâ: un al preferìs lis biondis, chel altris lis moris. Ma tant, cun dut chel barufâsi jenfri di se, al è simpri ledrôs e nol rivarès a concuistâ ni la bionde ni la more.
In sumis: se o viodês un zimul ruspiôs e un pôc lunatic, trancuîi: nol è rabiât cun voaltris, ma cun se stes.
Dome tal bar, il zimul si contente simpri: i baste ordenâ un un par doi.
Bêçs: Lavorant par doi, tu vuadagnarâs ancje il dopli, ma tant no tu varâs mai il timp di spindi.
Salût: Cuant che un zimul al sta ben, al sta mâl chel altri, ma tant tu tu vâs a lavorâ ancje cun 39 di fiere. In font, se chê altre personalitât e à 36, in medie e fâs 37,5. ❚
Bete di Spere