VIERZIDURE – Il Partît nazionalist scozês

Une cierte filmografie e à fat jentrâ tal imagjinari coletîf une vision pluitost violente dal popul scozês. L’esempli plui sugjestîf amplificât dal sucès cinematografic al è chel di William Wallace, il condotîr che te Ete di Mieç al vuidà la rivolte in armis de Scozie cuintri de corone inglese. Ma di là des sugjestions cinematografichis, la realtât dal Partît Nazionalist Scozês (Pàrtaidh Nàiseanta na h-Alba par gaelic o Scottish National Party par inglês), fondât ancjemò tal 1934, e je ben difarente (www.snp.org).
Intal Parlament scozês (metût sù tal 1998 inte suaze dal procès di devolution), dopo dôs legjislaturis tant che prime fuarce di oposizion ai guviers di coalizion jenfri laburiscj e liberâi democratics, il SNP al à vuidât un guvier di minorance intal 2007 e cumò al à otignût la maiorance assolude. Il partît al à une fonde sociâl democratiche di stamp european. Cun di fat, si bat par une distribuzion plui juste de ricjece tra lis classis sociâls, par une tassazion progressive, pe educazion di base gratuite par ducj, pal disarmi nucleâr, par saltâ fûr de NATO, ma massime par fâ deventâ la Scozie un stât indipendent dentri de Union Europeane.
Dentri dal SNP, il protagonist dai ultins agns al è Alex Salmond, che al vuide il partît dal 1990. Si definìs prime di dut un scozês e al tratarès cun cualsisei partît pûr di rivâ a otignî la indipendence de sô tiere, cence nissun preconcet par chês altris fuarcis politichis. Al va indenant cence padin par rivâ a chel risultât, che nancje 30 agns indaûr al someave dome une utopie e che invezit vuê al pâr di rivâ a tocjâlu cun man.
Par plui informazions cjale ancje il numar 7, mês di Lui dal 2007, da La Patrie dal Friûl (www.lapatriedalfriul.org).
Redazion