VIERS IL FRIÛL. Sapade-Plodn in place par vignî in Friûl

Provis gjenerâls di Friûl a Sapade-Plodn ai 22 di Mai passâts. Plui di cent e cincuante personis a son ladis in strade par berlâ “Jo no moli” e ricuardâ al Parlament di movisi par ricognossi al plui prest un dirit stabilît da Costituzion, ven a stâi chel di tornâ in Friûl, cussì come che al è stât decidût de popolazion cul referendum dal 2008. Buteghis sieradis e cartei, bandieris cu la acuile patriarchine, fruts e maris, sportîfs e nonos, un corteu lunc e vivarôs al à traviersât dut il paîs di Sapade, cence curâsi de ploie o dal frêt, rivant po dopo devant dal Municipi pal comizi finâl.
SINDICS E FONTANINI_Di prin une fuarte rapresentance di sindics de Cjargne, dai vicins di cjase di Fors Di Avoltri a Rigulât, di Prât a Ravasclêt, passant par Davâr, Comelians, Rigulât, fin jù a Tumieç e, a sorprese, ancje il sindic di Cjarlins, Navarria, a testemoneance che fintremai te Basse furlane la cuistion dal passaç di regjon e je un grum sintude. Nol podeve mancjâ il President de Provincie di Udin, Pieri Fontanin e cun lui, in rapresentance dal Consei regjonâl, Enio Agnola.
A completâ il cuadri di unitarietât di dutis lis istituzions dal Friûl Vignesie Julie, al è stât let dai organizadôrs de manifestazion (Alessandro Mauro e Danilo Quinz dal Comitât “Sappada in Friuli”) un messaç scrit de presidente Serracchiani che, scusantsi par no jessi presint, e à volût sclarî che si sta fasint il pussibil cun pressions sul Ministeri de Economie e sul Senât par sveltî i procediments legjislatîfs, cussì di rivâ finalmentri a ricognossi “no dome di fat, ma ancje par dirit” che il paîs dal Cjadovri al torni dentri dai confins dal Friûl.
STRACS_Fuartis e scletis ancje lis peraulis dal sindic di Sapade, Manuel Piller Hoffer: “O sin stracs e stufs di stâ tal limbo, e je ore di sierâ la partide, o Sì o No. I comuns in dì di vuê a son clamâts a cjapâ stradis e a fâ sieltis fondamentâls pal lôr doman, no si pues stâ trop a cincuantâ. La volontât popolâr e je stade clare e democratiche, si à di rispietâle, se di no nol à nissun sens domandâ a la int di esprimisi. In câs contrari, si podarès pensâ che cualchidun al vueli boicotâ la cuistion”.
E di “credibilitât des istituzions fuartementri a risi” al à fevelât ancje il conseîr regjonâl Agnola, intant che Fontanin, abraçant idealmentri dute la popolazion a non de Provincie interie, al à ricuardât che ducj i ats necessaris par leç a son stâts fats, provinciis e regjons interessadis an dit la  lôr, “e no si pues cumò tirâ fûr la cuistion dai coscj parcè che ancje su chê o varìn rason: sanitât, traspuarts, ents locâi – al à dit – noaltris sai paìn di bessôi e il Stât duncje nol piert nuie. Ma soredut, la nestre Regjon e ricognòs, e tutele e e difint par statût dutis lis minorancis linguistichis”.
Une rispueste francje a ce che al somearès saltât fûr de relazion tecniche su lis ripercussions finanziaris gjeneradis dal tornâ di Sapade-Plodn al Friûl, metude a disposizion de Comission Belanç dal Senât che e sarà clamade a dâ il so parê pal vie libare definitîf ae leç di passaç di Regjon pal comun.
DIGNITÂT_Di diestre a çampe, in Friûl no si fasin distinzions su Sapade, al à spiegât ae fin dal comizi il sindic di Tumieç Brollo, a non di ducj i coleghis: “divuardi cui che al scambie cheste rivendicazion cul folclôr: chi si fevele di sens civic e di dignitât. Fin a prove contrarie, i spiete a Rome cjatâ i argoments par no ricognossi il dirit a cambiâ Regjon, e la storie dai conts di sigûr si rivoltarà cuintri”.
Tes setemanis passadis, ancje il moviment autonomist Patrie furlane, a pene nassût, al à scrit une letare a ducj i candidâts governadôrs dal Venit par savê uficialmentri la lôr posizion sul passaç di Regjon sedi dal comun di Sapade che di chel di Cint. Il Friûl al à alçât la vôs, cumò Rome che e rispuindi. ❚
David Zanirato